Misiangtho Peter leh Paul Pawini

Nungzuipi te Makai pi ahi, Misiangtho Peter in Bethsaida khua mi, Nga beng khat ahi hi. Topa Jesu in a sap ciangin a inn leh lo, a nasep te nusia in Topa nung zui hi. Caesarea Philippi pan Topa Jesu in ama min Simon pen ‘suang’ cih khiatna a nei Petru tawh laih sak aa, “Nang in Petru na hi hi. Hih suangpi tungah ka pawlpi ka lam ding hi. Tua pawlpi Hell khua’ kongkhakte in zo ngei lo ding uh hi” ci hi. (Mt 16: 18)

Peter in Topa Jesu tawh om khawm tawntung himahta leh (3) vei vilvel Topa na nial hi. Topa Jesu in zong Peter in amah a it takpi na thu a kip sak nangin (3) vei na dong hi. (Jn 21: 15) Topa Jesu vantung ah a kahtoh khit ciangin Judah Iscariot mun a dingin Matthias a teel na uh ah Peter Makai in Topa Jesu in honpa ahih na thu hangsan takin tangko hi. Peter ii thungetsakna hangin pianpih khut leh khe zaw mi khat in damna ngah hi. (Act 3: 5)
AD 49 in Jerusalem thu kikupna a man khit ciangin Peter in Pasian thu tangko dingin Rome ah pai hi. AD 64 kum, Nero kumpi in pawlpi a bawlsiat hun in Peter in Vatican mualtung, singlamteh tungah lehkhai(bungbukhai) in thahna thuak hi.

Misiangtho Paul in Topa Jesu nungzuite langbawl in thah ding a lawp mahmah Pharisee khat ahi hi. Damascus khua ah a pai laitak, lampi ah ki khel in tua zawh ciangin Asia leh Greek gam te ah lungdamna thu tangko in pawlpi tampi a lam pa ahi hi.

Jerusalem khua ah anunung pen a paina lam kal ah a mipih Jew te in manin “Pasian a langpang pa” ci-in mawhsakna thuak hi. Amah in Roma minam hihna ngah khin ahih manin ama thu tawh kisai pen Empiror pan a khensat sak na ding a ngen hi. Roma thong sungah a om laitak Paul in “Ka nuntakna biakpiakna in hong kizat ding hun hong tung dekta hi. Hih leitung pan ka paikhiat ding hun hong tung ta hi. Galdona hoih ka do khin a, tai kidemna ah a mong dongin ka tai zo hi. Upna thu kiptakin ka kemcing zo hi” ci-in gelh hi. (2 Tim 4: 6-7). AD 64 kumin Paul in ngawng tanin thahna thuak hi.
Misiangtho Peter leh Paul te aw…Kote adingin thu hong ngetsak un.