Misiangtho Peter Canisius (December 21)

Misiangtho Peter Canisius in 1521 kumin Holland gam, Nijnegen ah suak hi. A pa lungkim nadingin a pa deihna bangin (the University of Louvain) ah Law tawh kisai pilna tawm vei sin hi. Ahi zongin ama lunglut nasep ahihloh lam a theih ciangin siangtho na lampi zui in Cologne ah pawlpi thu pilna sin dingin pai hi. Misiangtho Ignatius ii nungzui khat ahi, Peter Faber I thugen pen Pasian thu lungngaihna khat ah a ngaih laitak in (Society of Jesus) Jesuit sangah lut dingin khen sat hi.
Jesuit ki pawlna ah Siampi a suah khit ciangin Peter Canisius in Pasian thu gen siamna tawh minthang hi. Misiangtho Ignatius in Peter Canisius pen “ki ginkholhna tak tawh bang bang vai ahi zongin sem dingin a om mi” ci-in lamlak hoih Pasian nasem khat in ciamteh hi. A sawtlo in Peter Canisius in Rome pan Germany ah sawlna ngah hi. Germany ah Peter Canisius in Germany gam pawlpi a langpangte puahphain mi pi sungah pasian nasem te ki pawlna nasepna te a hoih kik na dingin samkhia hi.
1552 kum ciangin Peter Canisius in Catholic upna a nusia, gam mi 90% a om na ahi, Vienna ah sawlna ngah hi. Tua lai a om Siampi sang tampi te in a ki om thein awn lo zah dongin lui in sia mahmah aa, kum (20) sung tawntung tua lai ah Siampi suahna zong om lo hi. Peter Canisius in itna tawh a nasepna hangin Vienna mite lungsim ki khel kik sak zo hi. Peter Canisius in a damlo mite bawl in, thongkia te kiangah hawhin thapia den hi. Tua banah mizawng, mi cimawh te zong huhin kem hi. Tua lai ah amahin Catholic laibu bawlna zum zong phuan hi. Ama nuntak sung mahin ama bawl lai bu (200) vei bang thotkhia zo in pau nam (15) tawh letkhiatna zong ngah hi.
Tua bangin gualzawhna, minthanna te a ngah hangin Peter Canisius in ama nuntak sung tawntung, kiniamkhiatna leh thu mangna tawh nungta in om hi. Tua ban ah Vienna siadaw dingin teelna leh Jesuit kipawlna ii makaipi dingin teelna te zong kiniamkhiatna tawh nial hi. Misiangtho Peter Canisius in 1597 kumin Fribourg ah si hi.
Misiangtho Peter Canisius aw..Ko te adingin thu hong ngetsak tan.