Misiangtho Paul kikhelna (January 25)

Paul in Turkey gam, Tarsus khua ah Jew pawlpi upna azui nulepa te sung pan suak hi. Amah pen Rome minam khat in asuak khat ahi hi. Pilna picing taka sin theih nadingin Jerusalem khua, Phariseete’ uk sungah pilna sin hi. Jew te’ thukhun sungah athalawp mahmah khat ahih mah bangin Misiangtho Stephen suang tawh aki denlupna ah huh in, Christiante in Pasian um lo pawlpi khat ahih nading, hanciamin a kibawlsiatna ah Paul in panpih hi.
Tua ban ah Christiante manin Jerusalem ah pai sak nading thu, Siampi liante in Paul vaipuak pia uh a, tua vai tawh Paul Damascu ah pai hi. Damascu atun kuan ciangin vantung pan a taang mahmah khuavak khat in akimkot tanvat ahih manin amah leilak ah tuuksuk hi. Tua khit ciangin “aw” khat ging a, “Saul, Saul aw, bang hangin kei hong bawlsia na hi hiam” cih aw khat za hi. Aman zong “nang kua na hi hiam” ci-in adot leh “kei in na bawlsiat Jesu ka hi hi. Ahi zongin tho in la, khua sungah lut in. Na hih ding thu kong hilh ding hi” (Act 9:4-6) a ci hi.
Saul tawh a tonkhawm te ahihleh pau zo nawn lo in diing dimdiam uh hi. Amaute in aw azak uh hangin kua mah mu lo uh hi. Saul a diingtoh ciangin amit in bangmah mu thei lo ahih manin a lawmte in khua sungah paipih uh hi. Ni thum asawt khit ciangin Ananias aki ci mikhat inn sungah lutin Saul lutungah akhut nga a, “ka sanggampa Saul, Topa Jesu in khua na muhkik theih nading leh Khasiangtho tawh nakidim nadingin kei hong sawl hi” ci hi. Tua khit phetin Saul mitte panin ngasalip bang khat kiakhia pah a, khua amu thei kik hi. Tua ciangin Saul in tuisawpna Sacramentu sangin anuntakna kikhel suak hi.
Misiangtho Paul aw…Ko te adingin thu hong ngetsak tan.