Misiangtho Patrick

Ireland gam a cing a kem Misiangtho Patrick in 385 kumin Britain gam ah suak hi. Kum (17) aphak hunin Ireland gamah sila dingin zuakna ngah hi. Gam sung, mual kawmah kum (6) sung om in upna leh siangthona te ah nungta in khangto mahmah hi.
Inn a ciah kik zawh a sawt lo-in Ireland mite in amah Ireland ah pai kikin amaute Pasian thu a gen nangin ahanthohna uh mangmat hi. 431 kumin Zateih sang khat ah Pasian thu leh pawlpi tawh kisai pilna te a sin khit ciangin Ireland ah Pasian nasem dingin sawlna ngah hi. Ireland a tun khit kum (1) ciangin Pope Celestine in Ireland ii siadaw za pia hi.
Amah in Ireland gam sungah pai kawikawi in ama upna, Pasian vangliatna thu te tangko in mi tampi pawlpi sungah kaikhawm zo hi. Tua thu Pasian umlo te’ Makai te in a zak uh ciangin Patrick thah dingin vaihawm sim uh hi. Nikhat amaute in Patrick Teipi tawh dawtlum dingin vaihawm uh hi. Ahi zongin Patrick in lampi ah ama gei aa a tu Sakol leng hawlpa tawh a tutna kikhel in tu ahih manin sihna pan suakta hi. Tutna a kikhelpih tua Sakol leng hawlpa in Patrick that na dingin a ki vaihawm Teipi sutna hangin si hi. Patrick in kum (30) sung a hanciamna hangin Ireland gamah Catholic thuzui kizel in khangto mahmah hi.
461 kumin Patrick in mual sangpen tung pan anunung pen thupha pia hi. Tua mual tungah ni (40) sung, antang in om aa, mailam hun ah Ireland pan Misiangtho te hong piang ding hi cih mangmuhna zong ngah hi. Tua Misiangtho te in “Nangin kote’ Pa na hi hi” ci-in la asakna uh zong mu hi. Amah asih khit ciangin a luang hawm pen ama lam masak pen Biakinn ah ki vui hi.
Misiangtho Patrick aw…Ko te adingin thu hong ngetsak tan.