Misiangtho Pascal Baylon Pawini. (May – 17)

Misiangtho Pascal in Spain gam ah 1540 kum, Khasiangtho Pasian pawini in suak hi. Amau innkuan in neihleh lamh azawng uh hangin Pasian thu a hahkat mahmah, Pasian thu lam ah a etteh huai innkuan ahi uh hi. Pascal in Khasiangtho Pasian pawini in a suak ahih mah bangin pilna ciimna tawh kidimin nu leh pa te thu hilhna, lamlahna te a mang mahmah khat ahi hi.
Pascal in mizawng innkuan sungpan ahih mah bangin ama hun neih khempeuh tuu cingna tawh bei ahih manin a lawmte tawh ki thuahin ki mawl hun ding zong neilo hi. A lawmte in Pascal zahtak mahmah uh a, khat veivei a ki tot a ki sel uh ciangin Pascal in thu hilh leh a lawm te in mang pah uh hi ci hi. Amah a pantah nuam mihau innkuan te kiangah Pascal in nuntak haksa mah ta leh ka innkuanpih te mah tawh omkhawm nuam ing ci-in gen hi. Hih thu hangin Pascal in innkuan lungsim picing nei-in Nu leh Pa te it in a thei siam khat ahihna ki mu thei hi.
Pascal te innkuan khua dangkhat ah a ki tuah khit uh ciangin Pascal in Franciscan tangval siangtho suak nuamin a ngetna ngah ahih manin a siangtho zateih tangval siangtho khat hong suak hi. Amah a kipia nasep vaipuakte amah in kiniamkhiatna tak leh lawp takin sem in a hun awng te pen thungetna tawh bei sak hi. Pascal in Siangtho Pumpi Sacramentu it mah mah in Tonu Maria zong beel mah mah aa, Khi zong khin den hi. Tua ahih manin Siangtho Pumpi mai ah pai in khukdinin thungen den hi. A tungsiah te in nasep haksa te a piak ciangin ama’n ki niamkhiatna tak tawh sangin sem den a, gualzawhna ngah den hi.
Pascal Baylon in 1592 kum, May 17, Khasiangtho Pasian pawini in si hi. Ama sihni pen ama Pawini in ki ciamteh hi. Ama hanah pai-in thu a ngen te in thupha vangliatna a tuam tuam a ngahna uh hangin 1898 kumin Pascal pen Misiangtho in ki tangko hi.
Pasian thu hanciam in innkuan lungsim picing nei a, nasep khempeuh ah kiniamkhiatna tawh hanciam taka a sem den Misiangtho Pascal aw…Ko te adingin thu hong ngetsak in.