Misiangtho Panteleon

Panteleon cih min in “mi khempeuh a hehpih” cih khiatna nei hi. Amah in kumzalom (4) hunin Christian siavuan khat hi a, Roma kumpi te’ cidamna ah a ki sam te a huh khat ahi hi. Panteleon in tangval no gual a tun ciangin a Nu’ hilh ahi, Pawlpi lamlahna pan pialin siatna lam ah a khangno nuntakna lam hong pial hi.

Ahi zongin a lungtang tawng sungpan in amah Christian nuntakna lam ah hong ki hei kik sak hi. Pasian umlo a Pa zong upna lam ah ki khelsak zo hi ci hi. Panteleon in mizawngte a bawl ciangin za tui man la lo-in hehpihna tawh bawl zel hi. Pawl khat te thungetsak na tawh dam sak hi.

Diocletian in Pawlpi bawlsiat a kipat ciangin Panteleon Christian khat ahih na thu alawm te pawlkhat in kumpi kiangah na gen hi. Tua ciangin Roma thunei te in amah manin sim mawhin bawlsia uh hi. Thusitna zum ah khut leh khe zaw mikhat a dam sak zo a om leh om lo a ki demsak ciangin Panteleon in zo hi ci-in tangthu khat ah ki gen hi. Tua bangin a lamdang damsakna a bawl zawh hangin Panteleon pen sihna daan pia veve uh hi.

Ravello a om, biakinn khat ah Panteleon ii sisan keu te ki kem in a mah phawkna ni thupi ni te ah tua si keu pen sisan in ki laih hi ci hi.
Misiangtho Panteleon aw….ko te adingin thu hong ngetsak tan.