Misiangtho Pantaleon Pawini. (July 27)

Siampite in hell sung apai leh amau bek a pai loh mah bangin vantung gam a pai leh zong amau bek pai lo hi. Mi honpi tawh pai hi ci-in Misiangtho John Mary Vianey in gen ngei hi. Bang hang hiam cih leh Siampite lam akhialh leh mi pawl khatte zong lam khial thei aa, amau lam aman leh mi pawl khat te zong lam manin vantunggam ah tun zo uh hi.
Tuni Misiangtho te sungpan Siampi thum te in vantung gam amau bek a pailo te ahi uh hi. Tuni July 27 ni in Misiangtho Pantaleon ii pawini hi. Panteleon in AD 275 kumin Nicomedia ah suak hi. Misiangtho Panteleon hun lai in Pasian a um mite in thahna thuak den uh hi. Nikhat Nikomedia Biakinn sung ah ahizong in tua mun ah aom Christian mi 20000 val in meihal lupna thuak hi.
Amaute in Christian ahih manun Emperor kumpi Maximian in mei hal lup na ding thu pia in tua bangin thahna a thuak ahi uh hi. Emperor kumpi in milim bia khat ahi hi. Tua bangin mei halna a thuak te sung pan Siampi thum suakta uh hi. Tua Siampi te in Hermolaos, Hermippos leh Hermokrates te ahi uh hi.
A taktak in amau thum te pawini pen July 26 hi-in, tua ni in Misiangtho Joachim leh Ms Anna te pawi tawh ki tuak ahih manin amaute kuamah in thei kha lo hi. Siampi thum te in mei kuang sungpan suakta in tua mun tawh a ki gamla mun khat ah om uh hi. Tua amaute om na aom upna khial mite amaute in thu hilhin lampi man ah puak uh hi.
Amau thum sungpan Siampi Hermolaos in khangnote tawh ki muhkhopna khuan ngahin inn veng aom khangno te kaikhawmin Pasian thu hilh hi. Tua Pasian thu sin te sungah Pantaleon ki hel nailo in inn mai ah a ki leh leh mi khat ahi hi. Panteleon pen mihau innkuan pan hi in a Pa pen Pasian thu umlo khat hi in, a nu pen Christian khat ahi hi. A Nu asih khit ciangin Panteleon lam khial in Christian nuntakna nusia hi.
Ahi zongin zatui lam pilna sin ahih manin tua lam ah a siam mahmah zatui sia khat ahih banah Emperor kumpi nangawn a bawl zatui sia khat ahi hi. Nikhat Panteleon in Siampi Hermolaos ii thu hilhna te za in lung lut mahmah hi.
Khat vei, gulpi tuk naupang a dingin Pantaleon in thungen hi. Amah in hih naupang a nuntak leh Topa nung zui khat ka suak ding hi ci-in thu anget leh tua gultuk naupang hong dam kik hi. Tua naupang ii a pa in mittaw khat hi aa, a ta ading thu a ngetsak a theih ciangin ama ading zong angetsak nang ngen hi. Tua ciangin Panteleon in thu angetsak leh tua pa mit in khua mu thei kik hi.
Tua ciangin Panteleon leh mittaw pa pai in Siampi Hermolaos kiangah tuisawpna sang uh hi. A upna a khang semsem Panteleon in Pasian umlo a Pa zong Christian a suah nadingin makaih zo hi. Panteleon in cinate a bawl ciangin mizawngte kiang pan bawl man sum la ngeilo hi. A Pa asih khit ciangin Panteleon in amau neih leh lamh te mizawngte ading hawmkhia in a inn aa nasem sila te zong na ut na na uh ah pai un ci-in suah takna pia hi. Tua pankipan Panteleon ii hoihna thu mun tuamtuam ah thang hi.
Tua hunin Emperor Diocletian in Christian te a bawlsiat mahmah hun hi aa, Panteleon Christian ahihna thu leh amah in cina Christian te a bawlna thu amah a haza mi pawlkhat in Emperor kiangah ko uh hi. Tua ciangin Panteleon ki manin zum ah thu sitna thuak aa, tua lai ah Siampi thum te in zong mapna thuak uh hi.
Tua munah thusit te in Pasian nusia in dawi biakna nazuih uh leh hong that lo ding ci-in Christian nusiat ding leh dawi biakna zuih ding teel sak hi. Ahi zongin amaute in a si uh zong un Pasian a taisan kei uh hi. Zankhat Fr. Hermolaos ii mang sungah vantungmi dan in puankang silh mikhat in upna hangin bawlsiatna a thuak nading thu gen hi. Amaute in simmawh bawlsiatna athuak uh hangin a liinglawng hetkei uh hi.
Amaute a kibawlsiat ni ding a tun ma ni in zinliing in Emperor ii a biak milim te kisia mang ahih manin kumpi Maximian a heh suak semsem hi. Tua khit ciangin amaute a ki thah nading in thu pia hi. Amaute sung pan Panteleon in bawlsiat a thuak pen ahi hi. Bang hang hiam cih leh ama thu ngetsakna hangin damlohna pan damna angah a om mah bangin thu sitna a thuakni in pumzaw khat dam siangna angah sak kik zawh man ahi hi.
Thu nei te in Panteleon pen a tuamtuam in bawlsia uh hi. Ganhing te nek dingin a koih uh hangin tua ganhingte in thamcik zong na susia lo hi. Namsau tawh a dawt uh hangin a namsau uh khuaimei bangin kawi ziau in bangmah tangtung lo banah sihna dan apia te nangawn Christian suak uh hi. Tua munah apai te in Pasian phatin bia ahih manun kumpi pa a heh suak tektek hi. Abawlsia te in zong hih nuam nawnlo uh ahih manin Panteleon a maisak nangin thum liang uh hi. AD 305 kum, July 27 ni-in Panteleon pen singkung tungah a khut akhe te khau tawh henin sik tawh sat gawpin a thah ciangbek in si pan hi. A lu a tan uh ciangin aliamma te sungpan sisan paikhia lo in nawitui bekbek paikhia hi. Amah a henna uh singkung panin zong a gah hong gah hi.
Misiangtho Pantaleon aw…kote adingin thu hong ngetsak tan.