Misiangtho Padre Pio Pawini. (September 23)

Kumzalom 20 hun sungin a minthang Misiangtho khat hong genin ki ci leh Misiangtho Padre Pio ki ci ding hi.
Misiangtho Padre Pio in 1887 kumin Italy gam, Benevento, Pietralcina khua ah suakin Unau (8) pha uh hi.

Padre Pio in Italy gam, San Giovanni Rotunndo a om, Franciscan zateih sang khat ah om hi. Amah in mite tawh omkhop nuamsa in deih hi. Ahi zongin ama paang, khut leh khe te ah Topa Jesu ii liamma te angah pankipan ama omnop bangin om ding ong piang thei nawnlo hi. Tua liamma te in 1910 kumin ama pumpi tungah hong piang hi a, kum (50) sung tawntung sisan luangin om hi.
Mi tul tampi te in ama kiangah hong pai-in thu hong dong uh hi. Padre Pio in leitungah Pasian nungta in aom na thu teci apang khat ahi hi. Amah in hun khat sungin mun nih ah om thei hi ci-in zong a ki ciaptehna tampi om hi.

Pawlpi upate in mitampi in atheih, aminthang zateih khat deihlo uh hi. Amaute in Pio ii angah thuphate amanlo pi hi ci-in gensia uh hi. Amaute in Pio kiangah nangin pawlpi sung ah buaina leh maizumna pia na hih manin mite muhna pan agamla thei pen ah pai in ci-in sawl uh hi.

Tua laitakin Pio in nasiatakin natna thuak takpi hi. Ama pumpi tunga om Topa Jesu liamma te in amah gimsak mahmah hi. Ama thu akigen siatna te in zong amah lunggim sak mahmah hi. Ama pumpi tunga om liamma te in 1968 kum, September 23 ni, amah asih madeuhin damin mangthang hi. Padre Pio in Tonu a beel mahmah khat hi a, kiniamkhiat mahmah hi.

Minthang nopna lungsim zong nei vet lo hi. Ama kiangah thu a ngen mite aman huhin kem den hi. Aman 1968 kum, September 22 ni-in zateih makaipipa ngetna tawh Missa biakpiakna bawl in kong vang pan mipite thupha pia hi. Tua khit ciangin ama khan sungah lut kikin Khi thungetna a khut ah lenin zan thapaai tutphah tungah tawlnga hi. 1968, September 23 ni zingsang lamin Jesu, Maria acih kawmin Pa Pasian angsungah tawlnga hi. 2002 kumin Misiangtho suaka, tua khit ciangin ama thu a kigelh laibu tampi hong piang hi.
Misiangtho Padre Pio aw…Ko te adingin thu hong ngetsak tan.