Misiangtho Norbert Pawini. (June 6)

Misiangtho Norbert in 1080 kumin Germany gam, Cleves ah suak hi. Ama nuntakna masa lam pen leitung nopsakna, gamtat siatna te tawh kidim hi. Kum (33) aphak ciangin accident khat tuak a, tua in ama gamtatna a kikhel nading in hun hoih khat ahi hi.

Khat vei, a nasia mah mah huihpi guahpi ki pei-in keek kiatna hangin a sakol lau lua in ki pekgawp ahih manin amah a sakol tungpan khiasukin si dektakin om hi. Nai khat a sawt ciangin Norbert in khua phawk kik a, amah in Pasian kiangah “Topa aw, kei bang hong hih sak nuam na hi hiam” ci-in dong hi. Tua ciangin “siatna te pan hong kileh inla, hoihna phatna bawl in. Lungnop kilem nading zong in. Tua khit ciangin ka nung hong zui-in” cih aw khat, a sung tawng panin ki gen hi.

Tua khit ciangin Xanten ah Norbert pai kik a, tua lai ah Siampi suah na dingin kiginkholhna in thungetna, mawhna daan lohna te tawh ama nuntakna ki gingin om hi. 1115 kumin Siampi a, mawhna pan ki sikkikin nungzuite nuntakna tawh nungta a, Siampidangte zong tua bangin a nuntak nading hanthawn hi.

Ama ngiimna te teci a pan nading in ama neihsa na te khempeuh pen mizawngte pia in Pope Gelasius II kiangah mipi theih in mawhsuut hi. Pope in zong ama utna, deihna mun koi mun koi mun ah hita leh Pasian thu tangko theihna phalna pia hi.

1121 kumin Norbert in mi tam a tun khol lohna mun, Premontre mual kawmah a lawm 13 te tawh ki pawlna khat phuan uh hi. Tua panin Premonstratesian Order hong piang khia hi. 1125 kum in Pope Honorius II na in amau ki pawlna kipsak hi. Tua zawh kum 5 a sawt ciangin Norbert in Magdeburg khua ii Siadaw dingin teelna ngah hi.

Norbert in Magdeburg khua ah mizawngte kithawi bangin puan silhin pai ahih manin siadaw huang a tun ciangin kong cingpa in Siadaw salo in amah lut sak lo hi. Tua ciangin midang te in amah Siadawpa hi ci-in a gen uh ciangin kong cingpa maizum mah mah aa, Norbert in kong cing pa kiangah “ka nau aw, bang mah ci kei, nangin hi lai ah kei hong sawl mite sangin thuman takin na khentat hi” ci hi. Norbert in Pawlpi sung ah thuman lohna te leh a hoihlo lamlahna te a bei na dingin phuahpha ding in khentat hi. Misiangtho Norbert in 1134 kumin si hi.

Mi Siangtho Norbert aw, kote ading thu hong nget sak in.