Misiangtho Mother Theresa of Calcutta Pawini. (September-5)

Misiangtho Mother Theresa in a lamdang diakin Misiangtho suah nading aki ngakhun ahi, kum (5) sung ngak kullo-in Misiangtho suahna ngah hi. Mother Theresa a sihzawh kum (2) asawt ciangin Pope John Paul II in “Blessed” ci-in tangko hi. Tua ahih manin Mother Theresa pen hunthak sunga Misiangtho suah nadingin ama thu akikan hun sungah atawmpen hunsungin a kitangko zo ahi hi.

Albinia minam numei khat ii nuntakna ah alamdang hunin 1948 kum, September 10 ni-in kipan hi. Theresa in kum (20) sung bang, India gam, lai sinna sangah lai hilhin om hi. Tua ni-in Darjeeling ah Meileeng tawh apaina pan Pasian sapna 'aw' za hi. Tua ‘aw’ in ama lungsim sung a sukkhak banah a lungsim tuamcip hi. Tua ciangin Theresa in Pasian in mizawngte tawh azawng khawm dingin kei hong deih hi ci-in upna nei hi. Tua ‘aw’ a dawn kik na in amah in “Saint of the Gutters” hawkguam sunga mite ii misiangtho hong suakin Christian nuntakna thak leitung ah hong lakkhia zo hi.

1910 kumin Balkans at Skopje ah suakin Gonsche Agnes Bojaxhiu cih min tawh nuntakna apankhia khat ahi hi. Meigong khat ahi a nu ii pattah siamna nuaiah akhangkhia khat hi a, 1928 kumin Island a om The sisters of Loreto sangah lut dingin inn pan paikhia hi. Ama misiangtho min pen Lisieux khua pan St. Theresa of the child Jesus (Oct-1) ii min la in Mary Theresa ci-in sam hi. Kum (19) aphak ciangin Calcutta a om, St. Mary sangah numeinote lai hilh dingin pai hi. 1944 kumin ama ii thu gen siamna, hanciamna, itna tawh naupangte a etna te leh angsung lungsim aneihlohna te hangin tua sang ii sang uk pi za ngah hi.

Meileeng tung pan a zak ‘aw’ hangin “the Missionaries of Charity” cih nungak siangtho kipawlna phuan a, tua kipawlna Pope kiangpan kipsakna lai angah nadingin kum (2) sung ngak kha hi. Pope ii kipsakna angah khit ciangin Calcutta khua, mizawngte om na ah pai-in tua lai ah naupangte ii liammate silsiang sakna, lampi tunga a si dektak uhamte khoina, TB natna leh an sawtpi a ngawl numei khat khoina cih te kipan pah hi. Tua khit ni te ah zong tua bang mah in sem zel hi. Siangtho Pumpi a san khit ciangin amah Biakinn pan pusuakin a khut sungah Rosary (Khi) tawi-in “itna angah lo te, a kipaai te, a kem a khoi ding a om lo te” zong hi. Ahi zongin gamlapi zon kul lo-in Pasian mintawh nasep nading tampite in amah na ngak uh hi. Kha tawm khat khit ciangin ama lai hilhna aa a sangnaupang pawlkhatte in ama nasepna ah huh uh hi.

1960 kumin Mother Theresa in India gam, a dang khua te ah nungak siangthote paisak a, kum (30) khit ciangin ama nasepna leitung mun tuamtuam ah kizel in minthang mahmah hi. Mother Theresa in “ko te in ulehnau vai, (minam) vai a nasemte ka hi kei uh hi. Mi pawlkhat ii muhna ah minam vai aa asem in hong mu kha ding uh hi. Ahi zongin leitung lungtang laizangah Pasian thu ahawmkhiate ka hi ding uh hi. Nasepna ngeina khat tungah itna lianpi tawh ka sem ding uh hi” ci-in gen hi.

1979 kumin kilemna nobel letsong angah, Mother Theresa in Media te ii lunglutna ngah mahmah hi. Ahi zongin mizawngte sungah ama ii nasepte kikhel lo-in sem suak hi. “Siangthona in mi tawmnote ii lungnopna hi lo hi. Nang leh kei ii ih zuih ding thu khat ahi hi.” Calcatta ah ama nasepnate ahuh theih nadingin angen te kiangah Mother Theresa in “nang mahmah ii Calcutta khua zong in. A gamla pi ah Pasian zong kei-in. Tua mun ah Pasian om-lo hi. Pasian in na gei nai ah om hi. Amah in nang tawh hong omkhawm hi” ci-in dawng kik hi.

Mother Theresa in 1997 kum, September (5) ni-in si a, India kumpipa in ama nunung hun bawlna pen gam ukte ngeina bangin bawlsak hi. A luanghawm pen The Missionaries of Charity nungak siangthote sang huangsungah kivui hi. Ama hanin pawlpi tuamtuamte ii zahtak piakna mun hong suak hi. 

Misiangtho Mother Theresa aw….Ko te adingin thu hong ngetsak in.