Misiangtho Maximillian of Tebessa

AD 295 kumin Roma galkap khat in Algeria ah pai-in tua lai adingin galkap thak te kaikhawm hi. Galkap thak a tamzaw in amau utna tawh a lut ahi uh hi. Ahi zongin galkap lui te’ ta te in gam adingin na sem hamtang ding cih thu om ahih manin Maximillian zong galkap lui ahi, a Pa in tua lai ah puak hi. Tua hun in Maximillian in kum (21) pha pan hi. Amah pen a tun sangin tha leh gal tawh kidim ahih manin galkap dingin a ki tuak mahmah khat ahi hi. A lungnop huai lo thu khat ah dawi baikna pen Roma galkapte adingin a thupi pen khat ahi hi. Tua bang in dawi biakpiakna ah Christian mikhat a ki hel ding pen ki lawmlo hi ci-in Maximillian in ngaihsun hi.
Maximillian leh galkap bu pa ki ho khopna thu pawl khat hoih takin a ki kem hi. Tua ki ho na pen hunthak lai gelhna tawh hi bangin ki mu thei hi.
“Kei’ galkap te in Pasian galkapte ahi hi. Hih leitung adingin gal ka sim zo kei ding hi. Tua ki do na ah kei ka ki hel kei ding hi” ci-in Maximillian in gen hi. Tua ciangin Roma galkap bu pa in “bang hangin hi bangin lungtang khauh na hi hiam? Tua bang ngaihsutna kua in na lungtang sungah hong guan hiam” ci-in a dot ciangin amah in “Kei lungtang sung pan hong pai thu leh kei hong sam mi khat hang ahi hi” ci-in dawng kik hi.
Roma galkap bu pa, Maximillian ii Pa lam ah ki hei in, “Na tapa thu hilh in” a cih ciangin Maximillian ii Pa in “Ama upna aman thei hi. Ama ading ahoih pen hi ci-in a ngihsut bangin aman ahih ding ki lawm hi” ci-in dawng kik hi.
Tua ciangin Roma galkap bu pa in Maximillian kiangah “galkap na sem dingin lungkimna seal na sang hiam” a cih leh Maximillian in “Seal ka sang kei ding hi. Ka Pasian ahi, Christu ii seal ka sang khin hi. Nang’ seal in ki manna neilo hi. Anungta tawntung, Pasian tapa, ka Topa Jesu Christu ii hotkhiatna sang khin ka hih manin tua seal ka ngawngah ka awk zo kei ding hi” ci-in gen hi.
Sihna dan piak dingin a gen khit ciangin Roma galkap pa in Maximillian zol dingin hanciam kik hi. “Galkap nasepna in khangnote adingin a sep huai khat ahi hi. I Makai te huhin amau na asem Christian galkap tampi om hi” a cih ciangin Maximillian in “Amaute in amau adingin ahoih pen thei uh hi. Kei in Christian khat ka hi hi. Ka lungtang sung pan galkap sungah lut in nasep ding kei hong kham hi” ci hi.
Tua ciangin galkap bu pa in “tua ahih leh tu mahmah in na Christu kiangah kong puak ding hi” a cih leh Maximillian in “tua thu sangin a hoih zaw koi ah om ding hiam? Ki siatna sungah ka tung kei ding hi. Hi leitung pan ki paikhiat leh ka kha in ka Pasian, Christu tawh nungta khawm ding hi” ci-in dawng kik hi.
Maximillian ii min pen galkap sungpan lakhia in, thu palsatna tawh amah mawhna dan piak dingin khentat uh hi. Amah thah dingin vaipuak neite in amah that dingin a ki thawi laitakin Maximillian in alawmte kiangah hangsanna aneih na dingun tha pia in hanthawn hi. Tua banah amah a that mite, ama puanthak te a piak na dingin a Pa kiangah vaikha hi.
Misiangtho Maximillian aw…Ko te adingin thu hong ngetsak tan.