Misiangtho Mary Magdelene de’ Pazzi Pawini. (May- 25)

Misiangtho Mary Magdelena in 1566 kumin Italy gam, Florence khua ah suak hi. Kum (16) aphak hunin Florence khua a om Carmelite nungak siangtho sangah lut hi. Nungak siangtho puantual angah khit pankipan ama lungtang sungah Topa Jesu adingin gentheih haksatnate thuak nopna tawh kidim hi.
Khat vei nasia takin a ci-na aa, ahi zongin amah in kamkhat zong thumlo taulo in athuakna hangin alawm nungak siangtho khatin “Mary aw..hi zahtakin gim napi cin, bang hangin kam khat zong thum lo in koi ci thuak zawh na hi hiam?” ci-in a dot leh Mary in Topa Jesu lim atuang Singlamteh kawkin “Topa Jesu ii gimthuaknate alungsim sungah phawkin ama thuak gentheih haksatnate pen Topa Jesu gimthuakna te tawh Pasian tungah a-ap mite in amau thuak gimnate pen thuak nopin lungkimhuai hi cih mu uh hi” ci-in dawng hi.
Misiangtho Mary Magdelene ii nuntakna sungah thupha tuamtuam sanna leh ze-et na thuakna te khat khit khat kilaih den in kum (5) sung tawntung bang lametna bei bangin kalsuan ngei hi. Ahi zongin Pasian tungah akoih, ama upna leh lametna te bei tuan lo hi. Ama ii thungetnate angah kei phial zongin amah lungdam den hi. Bang hang hiam cih leh ama nget bang hi lo in Pasian deihna bang hi-ta hen cih lungsim aneih man ahi hi.
Mary Magdelene in ama ii thungetna te leh ki dekna te pen leitung ahoihin a kikhel na ding leh Pawlpi sung phuahthak na dingin Pasian tungah ap hi. Ama hun nunung kum thum sung pen lupna tung ah bei-in 1607 kumin si hi. Misiangtho Mary Magdelene pen pumpi damlote leh sexual lam simmawhna athuak mite ahuh Misiangtho in ki ciamteh hi.
Misiangtho Mary Magdelene de’ Pazzi aw…Kote a dingin thu hong ngetsak tan.