Misiangtho Martha Pawini. (July-29)

Misiangtho Martha in Mary leh Lazarus te sanggam nu hi. Jerusalem khua gei, Bethany khua ah teng hi. Topa Jesu in amau unau it mahmah in hawh zel hi.

Khat vei lengla te ading aki sam te Martha in sem in a buai mahmah lai tak, a sanggam nu Mary in Topa Jesu khe phungah tu in a hopih hi. Tua in Martha lung sim nawngkai sak mahmah hi. A hi zongin Topa Jesu in (Lk 10: 41-42) “Martha Martha aw, nangmah in na tampi tungah lung himawh in na kilung gim sak hi. A ki sam na khat bek a om hi.

Mary in tua na hoih zaw teel khin a, ama tungpan kilakhia lo ding hi” a ci hi. Lazarus a sih ciangin Martha in Topa Jesu kiangah “Topa aw nang aom hi lecin ka sanggampa si lo ding hi, ahi zongin tu nangawnin zong Pasian’ kiangah na nget peuhpeuh Pasian in hong pia ding cih ka thei hi” a ci hi. Topa Jesu in “kei mah in thawhkik na leh nuntakna ka hi hi, kei hong um mi in a sih hangin a nungta ding hi” ci-in gen hi. (Jn 11:21-22,24).

Tua khit ciangin han ah pai a, Jesu in ngaihtakin “Lazarus aw, hong paikhia in” a cih ciangin misi pa hong paikhia hi. (Jn 11: 43). Nasep tam inn nupi te lim alak Misiangtho Martha pen anhuan te a huh misiangtho in ki ciamteh hi.

Misiangtho Martha aw…Kote adingin thu hong ngetsak in.