Misiangtho Lucy pawini. (December 13)

Misiangtho Lucy in kumzalom (3) hunin Italy gam, Syracuse ah suak hi. Lucy a neu lai in a pa in sihsan ahih manin a nu bek tawh om uh hi. Amau pen sumlehpaai lamah nuam a sa innkuan te ahi uh hi. Kum hong sawt pian ciangin a nu hong dam lo-in gim mahmah aa, siavuan siam te in zong dam sak zo lo uh hi. A sawt ciangin leeng tawh sawn hong kul liang ta hi.
Tua bangin kum 4 sung bang dam lo in a nu a om zawh ciangin Lucy’ lawmte gen na bangin anuta un, Misiangtho Agatha hanah pai-in thu anget uh leh St. Agatha ii thungetsak na tawh a nu in damna ngah kik hi. Tua bangin a nu hong dam kik ciangin anuta un a neih alamh te uh zuakin a ngah sum te pen Pasian min tawh thahna a thuak Christian innkuan te huhna in pia khia uh hi.
Lucy in aneu tungpan kipan siangthona thupi sak mahmah a, Topa Jesu adingin ki-ap sim hi. Syracuse pan amah angai tangval khat, Lucy in anial ciangin amai lah zum, aheh lah suak lua ahih manin Lucy Christian khat ahih na thu gam uk te kiangah gen hi.
Tua hun pen 304 kum, Diocletion te in Christian te abawlsiat mahmah hun ahi hi. Tua ciangin gam ukpa in Lucy upna asuksiat nop manin puansilh lo in numei paktatte’ om na inn ah akoih nading un thu pia hi. Ahi zongin Pasian in Lucy lungsim akikhel loh nadingin thupha pia ahih manin tua ze-et na tangtung lo hi.
Tua banah mei tawh ahal uh hangin bangmah cituan lo ahih manin galkap te in Lucy mittang te lakkhiatsak uh hi. Ahi zongin Lucy in nidang sangin hoih zaw sem lai hi. Anunung ciangin amaute in Lucy ngawng namsau tawh tan in that uh hi. Misiangtho Lucy pen mittaw te a huh Misiangtho in kiciamteh hi.
Misiangtho Lucy aw…Ko te adingin thu hong ngetsak tan.