Misiangtho Louis Martin & Zelie Guerin Martin te pawini. (July – 12)

Catholic pawlpi sungah ki teenna Sacramentu a sang, hih nupate in amasa pen nupa Misiangtho suak te hi uh a, Misiangtho Theresa (St. Therese of the child Jesus) ii nu leh pa te zong ahi uh hi.

Amaute in France gam pan Louis Martin leh Maire Zelie Guerin te ahi uh hi. Louis Martin in 1823 kumin suak a, Zelie Guerin in 1831 kumin suak hi. Amau tenih in a ki muh phet un a ki ngai te zong ahi uh hi.

Louis Martin ii a pa in galkap khat ahih mah bangin Zelie Guerin ii pa zong galkap khat mah hi. A pa te nih in galkap ahih mah bang un tenna mun ki cian neilo in aki tuah pah pah kha te ahi uh hi.

Marie Zelie kum (13) a phak hunin Alencon ah ki tuah uh hi. Tua gei a om Lei tungah Louis Martin tawh ki mu kha uh a, aki muh zawh uh a sawt lo-in ki teeng uh hi.

Amaute in Pasian nasem dingin Siampi sang, nungak siangtho sangah lut ding a lunggulh te hi uh a, ahi zongin Pasian gelna bangin amaute tungah Pasian sapna in ki teenna ahi hi.

Louis Martin in Nai bawl nasep semin, Zelie Guerin in puan phan nasep sem hi. Ta (9) nei uh a, tua sung pan (5) bek khansuah in (4) te ahih leh a neu lai un si uh hi. Louis Martin leh Zelie Guerin te in a tate uh Pasian a it nading, a thumang nading un hilhin lamlak den uh hi.

Zelie Guerin in kum (46) aphak hunin Cancer natna tawh si hi. Tua khit ciangin Louis Martin in a zi nuntak lai a a ki gen sa bangun Lisieux ah ki tuahin tua lai ah a tate adingin pa citak khat ahi hi. A tanu (5) te in a vekpi un nungak siangtho suak uh hi.

Louis Martin in a nung lam ciangin kum sawtpi dam lo-in, pumzawt natna tawh kum (71) a phak hunin si hi. Louis Martin leh Zelie Guerin te in 1853 kum, July (12) ni-in ki teenna sacramentu a san mah bangun, amaute’ pawini zong July (12) ni-in ciamteh in ki bawl hi.

Misiangtho Louis Martin leh Zelie Guerin te aw…kote adingin thu hong ngetsak un.