Misiangtho Lawrence of Brindisi Pawini. (July 21)

Capuchin zateih te sungpan thugensiam in aminthang pen ahi, Misiangtho Lawrence in Italy gam, Brindisi khua ah 1559 kumin suak hi. Kum (16) aphak hunin Verona a om Capuchin zateih sangah lutin amin zong Caesare khua pan Lawrence ci-in laih hi.
Padua University ah Theology leh Philosophy te a sin laitakin pau namkik leh Laisiangtho thu te ah lamdang takin a theih a siamna thu lakkhia hi. Siampi a suah khit ciangin Lawrence in Europe gamah thugen siamin a minthan banah Jew minamte lungsim a kikhel nading in zong semkhia zo hi. 1598 kumin Pope Clement VIII na in Lawrence pen Jermany ah Capuchin zateih sang phuansak hi.
Lawrence in ama ii siangtho na hangin Hungary gam a sim Turkey galkapte a do dingin Emperor Rudolf II ii a sawl galkapte a en Siampi dingin vaipuak ngah hi. 1601 kum, Szekesfehevar gal kidona a tunma in galte’ seh li suah seh khat bek apha Christian te thapiakna khat nei hi. Tua khit ciangin Singlamteh len kawmin mipite mai ah Sakol tuangin makaih hi. Tua kido na ah Turks minamte in gal lel in Europe gam sungah lauhuaina te bei siang hi.
1602 kumin a kibawl Capuchin zateih te thu kikupna pan Lawrence pen Capuchin zateih te ii makaipi dingin ki teel hi. Lawrence in ama nasep vaipuak te hanciamtak in itna leh deihsakna te tawh sem hi. Lawrence in ama Pasian nasepna te lunglut takin a sep banah thungetna tawh pilna te thu thuk takin a sin kawmkawm mikhat hi a, 1619 kumin si hi.
Misiangtho Lawrence aw....Ko te adingin thu hong ngetsak tan.