Misiangtho Junipero Serra Pawini. (July – 1)

Misiangtho Junipero Serra in 1713 kumin Spain gam, Petra khua ah suak hi. A neu min pen Miguel Jose Serra ahi hi. Miguel Jose in a neu lai in a nu leh pa te huh in Bawng leh Lawi te cingin Mangbuh leh Bee tuam tuam te tuh pih zel hi.

Miquel Jose Serra in San Bernardino biakinn a om, St. Franciscan te om na ah hawhna pen a deih mah mah khat ahi hi. Amah in lasak zong a siam mah mah khat ahi hi. Kum (16) a phak hun, 1730 kumin, Franciscan sangah lutin Franciscan ki pawlna aphuan khia Misiangtho Francis of Assisi ii neu lai a alawm ahi Junipero pahtawina in Miquel Jose Serra cih min pan Junipero cih min tawh laih hi. Tua lai ah neih leh lamh hauhna te leh leitung na te nusiat ding ki ciamna nei hi.

1737 kumin Junipero Siampi suak a, 1740 kum in Theology sin kipan in, Palma de Majorca a om, Lullian College pan doctorate in theology buaih ngah hi. Tua bang buaih a ngah te in sang naupangte lai hilh kik kha hih mah ta leh 1748 kumin, Fr. Junipero in a sang naupang Palou tawh South America ah mission pai ding lunggulh in ki kum uh hi. Tua ahih manin 1749 kumin Fr. Junipero leh a lawm te in Mexico ah khe tawh pai uh hi. Sakol tuang dingin a ki genpih hangin amaute in nial uh a, St. Francis Assisi ii thukhun zui-in a damlo mi te hi sam lo ka hih manun, a kisam lo pi-in Sakol ka tuang kei ding uh hi ci-in gen uh hi. Lamkal tawntung ah khua mite’ huhna tawh a khualzinna uh zom uh hi.

Tua bangin khe tawh a pai na uh hangin Fr. Junipero a khe te bawk gawp in a sawt ciangin tua in ama nuntak sung tawntung ah natna apia liamma hong suak hi. Tua ahih manin Fr. Junipero lam pai zo nawn lo ahih manin Mexico ah amah khawlsuak hi.

Tua lai ah Fr. Junipero leh Fr. Palou te in Pasian thu tangko in Pasian nasepna te a tangzai sem sem na dingin ki ukna lam ah Fr. Junipero in len a, Fr. Palou in lo kho nasem te makaihin numei te puan phan, puan khui cih te lamah panpih hi.

Tua bangin khua mite zong sepna bawlna te ah hong khantoh lai takin Spain galkap te leh munthak a om nuam in gam keek mite hong lutin Missionary te sep leitang te ngen uh hi. 1755 kumin khua mite in a leitang te uh la kik zo uh hi. Fr. Junipero in a lungsim sungah ahoih lo ngaihsutna te a lut sialin amah leh amah ki satin thu ki hilh den hi.  Apuan te balkeek in amah leh amah mawhnei mi khat, a kilawmlo Siampi khat ci-in ki gen zel hi. Alawmte in amah zahtakin a phat uh hangin Fr. Junipero in ki niamkhiat takin om den hi.

Tua hun in gam vai buai huai mahmah hi. Russia in America ah lut in Spain in Russia zawh ding hanciam uh hi. Tua ciangin Spain kumpi in Spain Emperor sung a om Jesuit te hawlkhiat nading thu pia in 1767 kumin Mexico gam ii Spain ulian pa in Jesuit te khempeuh amau gam pan hawlkhia hi.

1768 kumin Fr. Junipero leh a lawmte in Jesuit te phuatsa, Loreto ah tungin kum 4 a sawt khit ciangin tua Mission nasep pen Dominican te kiangah ap uh hi. 1768 kum ciangin Mexico (Spain gam thak) ii thusitpi ahi Jose de Galvez in Fr. Junipero pen California ah mission nasepna a makaih dingin teel hi.

Fr. Junipero in tua mun a tun khit ciangin a khe natna nasia sem sem taleh tua natna awlmawh man lo-in Pasian thu tangko a, San Diego bek thamlo, Monterey dongah Pasian thu tangko dingin hanciam hi.

Tua mun ah gilkial dangtaakna te zong tuak den hi. Ahi zongin lungkia lo-in Pasian thu tangko a, mi tampi te Pasian tungah upna ngahsak zo hi. A sawt ciangin Zateih sang tampi te zong lam zo hi.

Fr. Junipero in California ah kum (14) sung Pasian na sem in 1784 kum, ama kum (70) a phak hunin TB natna tawh si hi. Nikhat, natna gilnei St. Louis nungak siangtho khat in St. Junipero kiangah thu a ngetna pan damsiangna ngah kik hi.

Misiangtho Junipero aw…kote adingin thu hong ngetsak in.