Misiangtho Joseph

Tonu Maria ii lawmpa, Topa Jesu (Pa) akhoi avak pa ahi Misiangtho Joseph in David kumpi suanlehkhak sungpan apiang khat ahi hi. Misiangtho Joseph in Nazareth khua ah om in khut siam nasep sem a, Maria tawh kiteeng dingin zuthawl apia pa zong ahi hi. Ngeina leh tangthu sungah Misiangtho Joseph in Maria ateenpih nuam tangval tampi te lak pan teelna angah hi ci hi. Bang hang hiam cih leh aciangkhut tung pan Lily paak te apaak hang hi ci hi. Maria in Joseph tawh zuthawl akipiak kum mahin naupaai hi.

Joseph pen midik khat hi a, tua thu a theih ciangin a lawmnu maizumsak nuam lo ahih manin, maaksim ding a sawm hi. Ahi zongin tua banga a ngaihsut laitakin Topa’ vantungmi khat amang sungah hong kilanga, “David’ tapa Joseph aw, Maria na zi dingin na lak ding lunghimawh kei in. Banghang hiam cih leh ama’ naupaaina pen Kha Siangtho’ gaiisak ahi hi” a ci hi. Joseph  a khanlawh ciangin Topa’ vantung mi’ thupiak bangin a zi dingin Maria a la hi.

Bethlehem khua ah innkuan lai bawl dingin apai na uh pan Maria nausuak a, Misiangtho Joseph in naungek min dingin “Jesu” phuak hi. Mipil thum te in zong Naungek Jesu abia dingin pai uh hi. Tua mipil thumte a ciah khit uh ciangin Joseph ii mang sungah vantungmi khat hong kilang a, “Tho in, naungek leh anu la inla, Egypt ah taipih in, thu ka hong hilh kik matengin tua lai-ah va om un; bang hang hiam cih leh Herod in naungek thah dingin a zong ding hita hi” (Mt 2: 13) ci hi. Tua ciangin Joseph tho a, tua zan mahin naungek leh a nu la-in, Egypt ah taipih hi.

Herod a sih khit ciangin Topa’ vantung mi khat Joseph’ mang sungah thakhat thu-in hong kilang a, naupang le a nu Israel gamah a ciahpih na ding gen ahih manin Joseph tho a, naupang leh a nu Israel gamah ciahpih hi. Misiangtho Joseph ii makaihna, lamlahna hangin naupang Jesu in khut siam pilna leh pilna tuamtuam te tawh kidim hi.

Misiangtho Joseph pen Pawlpi in sih nuama sih nading hong huh misiangtho in ciamteh hi. Bang hang hiam cih leh amah in Tonu Maria leh Topa Jesu te huhna tawh upna kip leh lungnuam takin si hi. Misiangtho Joseph in Topa Jesu ii lungdamna thu atangko hun atunma March,19 ni-in si hi ci-in tangthu sungah ki ciamteh hi. Pasian Nu Maria ii asiangtho nuntakna akisiat loh na dingin ama nuntakna khempeuh piakhia ahih manin Misiangtho Joseph pen nungak siangtho nuntakna acing akem misiangtho zong ahi hi. Tua ban ah Misiangtho Joseph pen leitung bup tawh kisai pawlpi acing akem misiangtho in Pawlpi in ciamteh hi. Misiangtho Joseph min lo in amah abel mi khempeuh te a huh den Misiangtho ahi hi.

Misiangtho Joseph aw….Ko te a dingin thu hong ngetsak tan.