Misiangtho John of God

John in galkap sung pan upna ngah in a kikhel mikhat ahi hi. Kum (40) aphak hunin ama nuntakna khempeuh, Pasian tungah ap ding cih lunggulh mahmah hi. Ama I bulphuh thu in nisim nuntakna ah Pasian amuh nading ahi hi.
John in Spain gamah a hawhna pan, Avila khuami John ii thugen ngai-in nuntakpih hi. Amah in ama mawhna te hangin kisikkikin mipi mai ah amah leh amah ki sat gawp ding khen tat hi. Tua bangin ahih ciangin lungsim damlo hi ci-in kipawlna khat in amah manin inndei khat ah khum uh hi.
John of Avila in tua thu a zak ciangin John kiangah hong pai-in tha pia hi. John of Avila in John ii thu aman a theih ciangin tua bangin amah leh amah mawhna dan ki piak sangin a huhna a kisam mite huhna pia in a kep nading gen hi. Tua ciangin John of God in ama khentatna laih kik hi.
John of God in azawngkhal, a damlo mite huh nading zato khat phuan in a lungsim khempeuh tua nasepna sungah koihin damlo mite ading in na sem hi. Ama ii Pasian thu hanciamna hangin mi tampite’ huhna ngah hi. John ii phuat zato in numei paktatte ading leh tua nasepna adingin John in lawptakin nasem hi cih thu Granada Siadawpa in a zak ciangin John samin thu hilh hi.
Tua ciangin “Mihing tapa in mawhnei mite adingin hong pai hi. Amaute a kikhel na dingin hanciam ding ahi hi. Hih nasepna sem lo in om leng Pasian hong sapna ah a citaklo mi ka hi ding hi. Kei logal, ka zato ah a ginalo mi ka thei kei hi” ci-in John in gen hi. Tua pankipan tua Siadawpa in John ii nasepna ah tha lawptakin apanpih khat hong suak hi.
John in gun tuihualpi sungah tui akia mi khat a hotkhiatna pan damlo suakin 1550 kum, March 8 ni-in ama zato huang sungah a om thungetna inn sung, Pasian tau mai ah khukdin in thu a nget kawmin si hi.