Misiangtho John Baptist De La Salle

De La Salle tangval siangtho congregation a phuan ahi, Misiangtho John Baptist in 1651 kumin, Piantit gam, Rheims khua ah suak hi. Lungsim hoih nei-in, Pasian thu a hahkat a nulehpa te in John De La Salle pen Paris khua tangval siangtho sangah lut sakin 1678 kumin tua khua mah ah Siampi suak hi.
Siampi a suahzawh a sawt lo-in ama nuntakna mizawng naupangte’ pilna lam pattah na dingin piakhia dingin Rheims khua aa ama vaipuakte nusia hi. Ama neihsa khempeuh zuakin mizawng naupangte ading sang khat lamsak hi. Ama pilna sinsakna a lunglut sangsia (12) in ama nung hong zui-in amaute kipawlna khat in om uh aa, naupangte leh khangnote pilna lam ah makaih dingin anuntakna uh piakkhiat ding thu kim uh hi. Amaute pen De La Salle tangval siangtho te ci-in kisam hi. Lai sin sakna ah picing takin a sepzawh na dingun, kuamah Siampi suak lo dingin khen tat uh hi.
1698 kumin England kumpi, James II ii ngetna tawh John De La Salle in mihau te adingin amasa pen sang khat hongsak hi. Tua banah khut siam nasemte’ ta te adingin Nipi ni pilna sin sakna sangpi (Sunday Academy) zong phuan hi. John de La Salle in ama nuntakna sungah ze-et na tuamtuam tuak hi. Khat vei, sang sia te in John kiangah Paris khua a om ama sang a khaksak na dingin ngen uh hi. Tua banah amau kipawlna sung pan zong pawl khat te in John De La Salle in tangval siangtho sin naupangte sim mawh bawl hi ci-in mawh zong uh aa, Paris khua ii Siadawpa kiangah John De La Salle pen tangval siangtho pan hawlkhiat ding hoih hi ci-in thu puak uh hi.
Ahi zongin Siadawpa in amah hawlkhia in adang khat ama mun adingin teel sangin tangval siangtho hihna pan no paikhia zaw un ci-in thu pia hi. Asawt ciangin tangval siangtho te in Europe gam sung khempeuh ah Catholic sang hong zo uh aa, Pawlpi ii a lian pen lai hilh congregation khat hong suak hi.
Jonh De La Salle in 1719 kumin Rouen khua ah si aa, 1950 kum in sang sia/siama te ahuh Misiangtho in ki tangko hi.
Misiangtho John De La Salle aw….Ko te adingin thu hong ngetsak tan.