Misiangtho John the Apostle Pawini. (December - 27)

Topa Jesu it nungzuipi John (St. John the Evangelist) in Bethsaida khua mi, Zebedee’ ta pa St. James the Great ii nau pa hi. James leh John in a Pa Zebedee tawh gunkuang sungah a ngeen uh puaha om amuh ciangin Topa Jesu in amaute a sam hi. Amaute in zong thakhatin a pa uh leh a gunkuang uh nusia in Jesu nung a zui uh hi. (Mt 4: 21-22) Topa Jesu in amaute nih minthak ahi Sons of Thunder cih khiat na anei, Boanerges min pia hi.
John in Jn 13: 27 sungah amah pen nungzuipi te sungah a naupen hi-in amah leh amah “Topa Jesu it nungzuipi” ci-in gelh hi. Misiangtho John in Topa Jesu mel ki khel in Topa Jesu tawh om khawm in, a nunung nekkhawmna ah Topa Jesu ang-ah kigamin amah alehhek ding kua hiam ci-in dong hi. Topa Jesu singlamteh tungah thatna athuak laitak in nungzuipi te lak pan John bek mah singlamteh phungah om in athupi pen leh alian pen vaipuak ahi, Pasian Nu (Tonu Maria) acing akem dingin Topa Jesu’ vaipuak piakna ngah hi. Pawlpi ngeina sungah Tonu Maria vantungah aki lak tohna thu teci apang na Ephesus ah AD 49 hunin om hi.
Tua pan Mangmuhna lai siangtho a at na mun ahi the Island of Patmos ah hawlkhiatna thuak hi. Tua lai-ah hun tawmvei sung aom khit ciang Ephesus ah ciah kik in, John laikhak (3) te at hi. “It na in Pasian’ kiang pan ahi ahi. It na a nei mi peuhmah, Pasian’ ta hi a, Pasian a thei hi” (1Jn 4:7). A kum atam ciangin a tuu no te ahi, (thuzuite) kiangah John in “kong it kata te aw, khat leh ki-it un” cih thu bekbek gengen hi.
Amau te in bang hangin hih thu bekbek gen gen na hi hiam ci-in a dot uh ciangin John in “bang hang hiam cih leh tua thu in Pasian thu mah ahi hi. A zenzen in no te in zong tua thu nazuih uh leh no te adingin kicing hi” ci-in dawng kik hi. Misiangtho John in AD100 kum in Ephesus khua-ah si hi. Misiangtho John pen lai at siam te, mei kat te leh gu lut te a huh Misiangtho in kiciam teh hi.
Misiangtho John aw…ko te adingin thu hong ngetsak tan.