Misiangtho Joan of the Cross

Misiangtho Joan of the Cross in 1666 kumin Piantit gam, Saumur khua ah suak hi. Joan in unau 12 sung pan aneu pen hi aa, a nu’ sumbuk aman ngah hi. Tua sumbuk ah pawlpi van pawlkhat leh anbuk ah akizang kua leh keu pawlkhat zuakin tua tawh a innkuanpihte a vak thiamthiam ahi hi. Sum leh paai haksat luatna in ama lungsim zawngkhal sakin neih leh lamh lunggulh sak hi. Joan in nai tampi sung nasem kuanin a sumbuk zong ni 7 sung hong hi. A sumbuk gei a om thungetna suanghawm ah thu ngen dingin apai mite pen Joan in inn dei no khat kawm sak hi. Khutdawh ngente apai loh nadingin ama inn sungah nek theih khat zong koih lo-in om hi. Ama nuntakna sungah hau ding cih pen apiang thei lo hun khat ah aom lai takin aman a sumbuk pan angah sunsun te khol dingin khentatna khat nei-in hanciamin sem hi.
1693 kumin thungen a pai, khualmi khat ahi Frances Souchet in Joan ii nuntakna kikhel sak hi. Frances Souchet in Pawlpi tawh kisai aminthang mun tuamtuamte ah a pai kawikawi khat ahi hi. Amah aki muh tungin pi muh nop huai lo in thangah huai lo hi. A lungsim tawm khat aki sam, apicing lo mi khat bangin lam pai leh zong amah bek paupau thei hi. Joan ii sumbuk gei atun ciangin Pasian in amah asawl ahih na thu mite’ theih dingin kiko in gen hi. Joan in puan sia nilnelh asilh tua meigongnu pen aniam pen in sap sakin ama inn dei ah zan khat giak sak hi.
Frances souchet ii tua banga thungen a pai kawikawi na in Joan kisuang sak hi. Tua ahih manin Joan in ama om dan, agam tat dan hong khel hi. Mipite tawh thungetna ah kihel in Nipini in zong asumbuk khakin ki khawm hi. Midangte tawh aki bang lo, ahai tawh aki bang Frances Souchet in Joan om na ah khat vei thungen dingin hong tung kik hi. Ama gen den thu khat ahi, Pasian kiang pan apai kammal khat in Joan nuntakna kikhel sak hi. Joan in ta 6 anei, acimawh innkuan khat te huhzo, panpih zo ta hi. Asawt ciangin ama hanciam na tawh a dang micimawhte zong huh zo hi. 1698 kumin Joan in cimawh, zawngkhalte adingin kipiakhia in ama sumbuk nangawn khakcip hi. Mizawngte in huhna a kisap uh ciangin Joan kiangah pai-in huhna ngen den hi.
Joan ii inn in mizawngte, nulepa nei lo te, piteek puteekte leh adamlote’ belh innpi suak hi. Tua inn pen “Providence House” Pasian ii acing akep inn ci-in minthang hi. Joan in ama kiangah huhna angen khempeuh ahuh nadingin sumlepaai akicing aneihna thu agen ciangin Frances Souchet in “Piantit kumpi in ama sum bawm nang hong pia lo ding hi. Ahi zongin kumpite kumpipa in ama sumbawm nang adingin hong honsak den ding hi” ci-in tha pia hi.
Mincipna hangin Joan leh “Providence House” mun kituah kha hi. Kum tawm khat khit ciangin Joan in “The Sisters of St. Ann” congregation phuanin 1704 kumin nasep kipan hi. Amau kipawlna Pawlpi kipsakna angah ciangin Joan in Singlamteh a it Joan ci-in mitampi te theihna ngah aa, it na leh thungetna tawh nasem dingin nungak siangtho 40 amakaih khat hong suak hi.
Kha lam tawh kisai haksatna leh pumpi tawh kisai lungkhamna tampite thuakin Joan in Kum 70 aphak hun, 1736 kumin si hi. Pope John Paul II in misiangtho suak hi ci-in atangko ma in amah a it mi te in Joan pen misiangtho in sam khin uh hi.
Misiangtho Joan of the Cross aw…Ko te adingin thu hong ngetsak tan.