Misiangtho Joan of Arc pawini (May-30)

Joan of Arc pen 1412 kumin Piantit gam, Domremy-la-Pucelle khua ah suak hi. A nulepa te pen lokho mi ahi uh hi. Joan in anu inn nasep te huhzelin Pasian thu zong ahahkat mahmah, numei melhoih khat ahi hi. Kum 13 aphak hunin biakinn ah thungenin aom laitak, alamdang mahmah Aw khat a za hi. Ahi zongin aman kua mah gen lo-in tuabangin kem cing hi. Kum 17 aphak ciangin Aw za leuleu aa, tua Aw pai na lam a et leh St. Michael, St. Catherine leh St. Margaret te a mu hi.

Amau te in Joan in Kumpipa tapa Charles ahuh nading a gen uh ahi hi. Bang hang hiam cih leh tua hunlai-in Piantit gam pen buai mahmah a, Kumpipa lah si khin in, ama za aluah ding atapa pen gamsung buaina hangin kumpi lukhu kipia thei nai lo ahih manin Pasian in Piantit gam leh Charles ahonkhia dingin Joan ateel ahi hi. Pasian deihna Joan in atheih ciangin Charles kiangah va pai-in athu teng agen hi. Tua ciangin Charles in galkapte amakaih dingin Joan apaisak hi.

Joan in zong galkapte makaih in galdo ding apai ma in galkap te mawhsut sak in mawhsut aman uh ciang in Jesu leh Maria min a ki gelh dialkhai tawi-in kuankhia uh hi. 1429 kum, May kha ciangin Orleans ah gal te khempeuh zo ahih manin Rheims khua ah Charles kumpi lukhu khusak in kumpi za pia uh hi. Tua teng aman khit ciangin Joan in sawlna Aw za nawn lo ahih manin ama nasep ding manta hi ding hi ci-in ngaihsun a, akhua ah ciah ding in kithawi hi. Ahi zongin kumpi Charles in ciah sak lo-in, Compiegne munah galsim sak lai hi. Tua mun ah Joan gallel ahih manin gal te in manin thongsungah khum cip uh hi.

Tua bangin galte matna athuak hangin, Joan hanga Kumpiza angah Charges in awlmawh lo-in om hi. Tua bangin ahonkhia ding om lo Joan pen tua khuami te in Mangkang te kiangah zuak uha, Mangkang te in bawlsia gawpin Cauchon cih na munah hencip in koih uh hi. Amau te in hi numei in dawi tawh kipawl ahih manin hi zah in alamdang galte azo hi ci-in amawhsak uh ciangin Joan in Pasian sawlna bangin asem ahihna leh Misiangtho thum te tawh aki muhna thu hangtakin gen hi.

1431 kum, May 30 ni-in Joan pen meiphual kisepna tungah khuam khat phut uh a, tua khuam tungah Joan khihcipin, hal lum uh hi. A sih zawh kum 500 pawl ciangin Joan sihna thu leh ama thumanna ki nung theih kik in Pope Benedict XV in 1920 May 16 ni-in misiangtho suahna tangko khia hi. Joan asih lai in kum 19 pha pan hi. Amah pen Piantit gam acing akem misiangtho in kiciamteh hi.

Misiantho Joan aw.....Ko te a dingin thu hong ngersak tan.