Misiangtho Joachim leh Anna te Pawini. (July 26.2023)

Ms. ANNA leh Ms. JOACHIM
Hun le Nite a ciamtehthei a omma pek, leitung leh leitungmite a pian khit, mawhna ah mihing a puk khit ciangin, To Thum Pasian in thu a piakin ah: nikhat ni teh nungak khat sungpanin Tapa Pasian in mihing suahna la ding hi. Tua nungak in numei khempeuh lak ah a siangtho pen hi dinga, mawhcilna niinbaang khempeuh panin amah suakta ding hi, a ci hi.
(Tuu honpi khat leh innkhawi gan tampi a nei Bethlehem mihau nupa khat sungpanin Ms. Anna piang hi. Ahih hangin, amaute’n sum le paii ahi zongin, neih le lamh ahi zongin a neihzah vekpi uh lak panin mizawngte tampi khenin, amau’ adingin themcik bek a siit den uh hi. Anna a suah khit ciangin, Nazareth khua-gei, munhoih mahmahna khat ahi Sephoris gam ah amaute peem uh hi.
A neutuung pan kipanin Anna in Pasian’ thu ngaihsut ding leh thunget ding kin mahmah hi; inn ah nasep huh a thanuam mahmah khatin khangkhia hi. Tua bangin gamtat hoihin tumdang deuha, veng le paam ah tanu ettehhuai khatin om ahih manin, nupi dangte in a tanumeite’ kiang uh ah, Anna etteh un, a ci uh hi. Amah’n hong pai ding Gumpa’ thu a theih semsem ciangin, Pasian in tua a kipakhuai hun a tunsak baih nadingin thu a nak nget semsem hi.
A nu in a sih madeuhin Anna’ kiangah, ka tanu aw, nang pen teeltuam mikhat na hi hi; tua ahih manin, pasal hoih khat na ngah na’ngin thu ngen in, ci’n a vaikha hi. Anna pen lokho nungakno, a migi mahmah, a ngaihbaang, a thacing kumsawnvalgual khat ahi ta hi. Tangval tampitak ama pasal ding a ut thei mahmah uh hi.
Nikhat, Anna in Pasian’ kiangah, na thukhaam tawh kituakin hong nuntakpih thei ding pasal-hoih khat hong guan ta in, ci’n thu a ngen hi. Tualaitak mahin, Nazareth khua-gei huan khata teeng, Joachim kici kum 40 val a pha, a tuam mahmaha migi, tangvalpi khat in zong, Pasian’kiangah zi-hoih khat a ngen hi. Amah’n Anna thei-in a zahtak mahmah hi; ahih hangin, amah kiniamkhiat mahmah ahih manin, a zi dingin Anna a ngaihsun ngam kei hi.
Ms.Anna leh Ms. Joachim-te’ thungetnate vantungmite in To Thum Pasian’ tokhom mai ah a puaksak uh hi; tua ciangin, Pasian in, hih thungen tenih kiteeng henla, Messia’ Nu ii nu le pate hi ta uh hen, ci’n thu a pia hi. Amau tenih kiangah tua thu a taangko dingin Vantungmi a bu a maang khat ahi Gabriel a kisawl hi.
Anna in thu a nget laitakin ama kiangah vantungmi khat a kilangh hi. Vantungmite’ lak ah Anna in kua hi ding hiam cih amah bek in a thei hi; ahih hangin, ama genkhiat theih thu in hi bang bek ahi hi: “Pasian’ nasemnu aw, Topa in nang thupha hong pia hi! Honpa hong pai na’ngin thu nan gen zom lai inla, Topa’ sungah na kipak in. Na pasal dingin Joachim na sang in; tua in Pasian’deihna ahi hi.”
Anna a lungnopsak mahmah khit ciangin, a ihmu laitak Joachim’ kiangah Vantungmi pai leuleu-in, “Joachim aw, Topa in nang thupha hongpia hi! Thumaan cihtakna ah na hanciam den lai in. Pasian in Anna na teenpih ding deih hi. Amah’n Pasian’ maipha ngah ahih manin, amah zahtakin don inla, Pasain’ tungah lungdam ko in,” a ci hi.
Azingciangin, zuthol pia dingin Anna ii nu le pa’ kiangah liangko a lian, a thazeen Joachim a pai hi. Tua khit a sawt loin, inntual khat ah tua kopkhatte’ pumkhatsuahna pawi kician takin a kibawl hi. Tualaitakin Ms.Anna kum 24, Ms. Joachim kum 42 pha hi.
Amaute’n Anna ii pa’ gamh luah uh hi. A hauh mahmah uh hangin, nek le dawn, omdan khawldan siamin a cingh mahmah uh hi. Kumsimin a sumlut zah vekpi uh leh a tuute uh khen 3 a suah den uh hi. Khen khat Biakinnpi ah Pasian’ nasemte’ adingin a pia uh hi; khen khat mizawngte pia-in, a omlaiteng bek amau adingin a koih uh hi. Hi mah ta leh a gante uh lamdang takin a pung semsem hi. Amaute’n khualzin mizawngte anhuan zelin, a hehpihhuai a sanggamte uh tuu a hawm zel uh hi.
Amaute’n inn ah Pasian’ thu ngaihsunin, hahkat takin a ngetnget uh hong pai ding Honpa’ thu akikum pahpah uh hi. Anna leh Joachim-te a nih un a neutuung pek panin migi mahmah khin uha, tu-in a picing khin ahihna uh tawh a lamdangin a migi mahmah nupate ahi uh hi. Ahi zongin, vantungmi’ thuzaksakna kigen se kei uh hi.
Vanglian Pasian in ama pilna tawh a gik mahmah singlamteh suanin amaute a siansuahbeh hi; bang singlamteh hiam cih leh kum khat khit kum khat a gik tektek taneih theihlohna ahi hi. Tua hunlai-in taneih thiehlohna pen Israel mite’ lak ah kaamsiatna lian pen leh a zumhuai penin kingaihsun hi; tua bek tham loin, Honpa’ hong pai nding ah tua nupate in bangmah septheih nei lo hi, ci’n Topa’n ngaihsun hi, cih limlahna kicianin kisang hi. Tua ahih manin, Anna leh Joachim in mite’ zahpih neumuhna thuak semsemin, a veng a paam, a lawm a gualte’ zahkona nangawn a thuak uh hi. Ahi zongin, tua simmawhnate amaute’n lungduai takin thuakin, tanei thei dingin hong siam in ci’n Pasian’ kiangah thu a ngen den uh hi.
A thunget uh ngah loin kum 7 a omlai uh hi. Tua ciangin, Nazareth khua-gei, huanneu khat ah peemin, tualai ah Pasian’ thupha a ngah nadingun, kidekna a khauh zaw leh nuntak siangtho zaw tawh nuntak thak kipat ding a khensat uh hi. Bang hang hiam cih leh amaute’n, ih lungkhamnate pen Topa’ mai ah a kilawm loin ih gamtat khialh man hi, ci’n kiniamkhiatna lungsim hoih ih gamtat khialh man hi, ci’n kiniamkhiatna lungsim hoih tawh a ngaihsun uh hi. Mizawngte hehpihin, piakkiatna zong khan uh hi. Siangtho semsem nuam ahih manun, lungsim le pumpi zong a kidek uh hi. Pasian in ta khat hong piak zenzen leh Biakinnpi ah ama nasem idngin ka ap ding uh hi, ci’n kiciamna nangawn a nei uh hi.
Tua bangin, ze-etna sungah kum 13 sung a omlai uh hi. Nikhat, Biakinnpi sungah Joachim in biakpiakna a piak laitakin, siampipa in,“Joachim aw, bang hangin hi lai ah hong pai na hi hiam¿ Na biakpiaknate Topa’ san dingin kilawm lo hi!” ci’n a tawnggawp hi. Zumlua ahih manin, Biakinnpi’ kiu khat ah kihemin, amah’n, “Topa aw, ka mawhnate’ hangin hi bangin zum le dai ka thuak hi. Hih maizumna in nangma deihna hi, ci’n ka sang hi; tua ahih manin, kei hong paampaih kei ta in . . .” ci’n thu a ngen hi.
Tua khuapi nusia-in a gamla Hermon Mual-a om a tuute kiangah amah a pai hi. Khasia lua mahmah ahih manin, tualai ah Anna tawh kithuza loin kha tampi thungetna, mawhna daanlohna bawlin a om hi. Siampipa in a pasal a na totgawpna thu Anna in a lawmte’ tung panin a za hi; tua thu in khasiasak mahmah ahih manin, amah zong inndei sunga sualtungah bokin a kap zel hi.
Khatvei, pawi ennuam a nasem khat Anna in a khaam leh tua numeino in, “Lipkhaphuai lua na hih manin, Pasian in na tungah daan thuapnih hong pia hi: taseelin na oma-tu-in pasal in hong taisan lai hi!” a ci hi. Khasia mahmah ahih manin, Anna in tua numeino a inn ah a ciahsak hi.
Tua nitaklamin a huansunga po singkung gol khat nuai ah Ms.Anna tu-in ganvun tunga kigelh thungetnate a ngen hi; tua khit ciangin, Pasian’ kiangah, Joachim hong ciahsak kik inla, ta khat beek hong pia ta in, ci’n thu a ngen hi; amah kum 44 a pha ta hi. Tua ciangin, amah’n lawptakin Honpa’ hong pai nading thu a ngen hi; tua ciangin, Pasian in a teeltuam ding tua nungak siangtho leh tua innkuan hamphate’ thu zong a ngaihsun kha hi. Tua ciangin, amah’n, “Ama silate nasem ding nanggawnin kua kilawm ding ahi hiam¿ ci’n khatvei a khuisa hi.
Tua khit phetin ama mai ah a vaangtang, mihing meelpua vantungmi a bu a maang khat ahi Gabriel kilangh vatin, “Pasian nasem Anna aw, na thuumnate Topa in hong za hi. Amah’n na thungette hong dawnpah lohna in nang hong puahphatnop man leh na nget zah sanga tamzaw hong piaknop man ahi hi. Sangpengpa in nang leh Joachim’ tungah a lungkimhuai mahmah a siangtho tanumei khat hong piaksawm hi; bang hang hiam cih leh kiniamkhiat takin ama kiangah muanna tawh thu a ngente amah’n pakta pen hi. Tu-in amah’n kei hong sawlin na tungah hong gensak lungdamna thu in: Leitung’ Honpa a paai ding numei ii nu dingin Pasian in nang hong teel hi! Tanu khat na nei dinga, a min Maria kici ding hi. Amah numei khempeuh lak ah thupha ngah pen hi dinga, Kha Siangtho tawh kidim ding hi. Joachim’ kiangah zong a siangtho tanumei khat na nei ding hi, ci’n ka zasak khin hi; ahi zongin, tua numei pen Honpa’ nu ding ahihlam amah’n thei nai lo hi. Tua ahih manin, hi thusim na imcip in. Tu-in Biakinnpi ah pai inla, Topa’ tungah lungdam va ko in; Kham kongpi ah Joachim na mu ding hi,” a ci hi.
Gabriel a mangkik hi; a kiniamkhiat mahmah Ms. Anna lungtang genzawhloh lamdangsakna, lungdamna leh kipakna tawh a kidimleet hi; tua ahih manin, Kha Siangtho Pasian in thuakzawhna pia hi kei leh amah a sibup zo ding hi. Amah sualtungah boksuk pahin nuamna khitui tawh Pasian’ tungah sauveipi lungdam a ko hi.
Tu azan a mangin vantungmi khat in a inndei sunga kawmtungah a taangpha mahmah laimalpite tawh Maria cih min a gelh hi; zingsang akmasa a khuan ciangin, amah khanglo-a, a et leh tua laimal vaangtangte a mu hi. Lamdangsa lua-in, a tanu ding ahi a lamdang mahmah , a ithuai Maria a ngaihsunsun hi;zingsang phalvaktuung tawh a mankik dong mah tho-in Jerusalem pai dingin a kithawi hi; a man ciangin, a nasem khat tawh a ding khia hi. Amah kipak lua mahmah ahih manin, a meel a nosuah kik phial hi.
A gante’ laka ihmu Joachim kiangah vantungmi Gabriel zankim laitakin a va hawh hi. Gabriel in ama kiangah, Anna in Pasian’ kiangah a ki-ap ding, a siangtho tanumei khat nei ding hi; tua ahih manin, Biakinnpi ah pai inla lungdam va ko in; Kham kongpi ah Anna na mu ding hi, a ci hi. Joachim a khanlawh ciangin lungnopna tawh kidimin, Jerusalem a zuanpah vingveng hi.
Kha Siangtho Pasian in Biakinnpi sunga siampite’ lungsim na honsak ahih manin, amaute’n zong a na lungdampih mahmah uh hi. Tua ciangin, siampi nih in a Siangthona mun ah amah lutpihin, biakna-tua tungah lawbaan a khut khit uh hi teh amah kia a nusia uh hi. A khutte zaakin khukdin kawmin Joachim in thu a nget laitakin, a vaangtang vantungmi khat hong kilanghin ama kiangah a genin ah: na taneih theihlohna in na maizum nading hi lo in, maipha nan gah nading hi zaw hi; bang hang hiam cih leh na zi’ sungpanin hong suak ding naungek in Abraham’ suan le khak sunga paakpalh hoih pen hi ding hi, a ci hi. Tua khit ciangin, vantungmi in a Siangtho penna mun ah amah paipihin a taltung ah sathau a nilhsak hi; tua in ci le sa tawh kisai lungsim puakzia pawlkhat a pia hi; tua in ci le sa tawh kisai lungsim puakzia khempeuh panin amah a suaktasak hi. A Siangthona mun ah Joachim a kilehpih khit ciangin, vantungmi a mangkik hi; tualaitakin, sualtungah Joachim mangmu-in a omlai hi. A sawt lo in siampite in amah tua banga om a muh uh ciangin, a maisuah kha- nuamna tawh taang ahih manin, Joachim a moisuah kik phial hi. Amah’n siampite kiangah, Kham kongpi ah ka zi tawh ka kimu nuam hi, a cih ciangin, siampite in lampi a lak uh hi; tua lampi pen a sau mahmah, a kizem pha mahmah leh khuavak a ngahpha mahmah leinuai lampi ahi hi.
Ms.Anna in zong Biakinnpi’ langlam ah biakpiakna a na pia khin lian ahi hi; tua ciangin, amah’n siampi khat kiangah, vantungmi Kham Kongpi ah na pasal tawh na kimu ding hi, hong ci hi, a ci hi. Amigi numei pawlkhat tawh (tuate’ lak ah kamsangnu Anna zong kihel) amah’n zong tua leinuai lampi mah a tawn hi. Tua ciangin, Kham kongpi gei ah Ms. Joachim in a it mahmah a zi ama kiang zuanin hong pai laitak a mu hi; a zi maitang nuamna tawh kidimin a taang hi; a nih un kalnawhin kizuan tuakin a kikawi uh hi.
Tua khit ciangin, thupiang khempeuh a kigen uh hi; a thuget uh ngah ahih manun, Pasian’ tungah a nih uh lawptakin lungdam a kokhawm uh hi. Biakinnpi ah ka ta uh kong ap ding uh hi, ci’n a kamciam uh a thasuah sakik uh ciangin, a nih un mangmu tawh akibang phial uh hi. Vantung khuavak in amau tenih a tuamcip hi; tualaitakin, vantungmi honpi khat amaute tungah a laam hi. Amau tenih a taang zeizai uh hi. Leitungah tau banga a tuamngiat lungsim sianthona a ngah nupa kop dang a om ngei nai kei hi. Tua ciangin, tha khatin vantung kihongin, To Thum Pasain in itna leh nuamna tawh amau tenih eusukin, a tuam mahmah thupha khat a pia hi.
A zinglam ciangin, Ms.Anna leh Ms. Joachim in Jerusalem nusia-in, Nazareth khua-gei, a inn uh ah a ciah uh hi; tualai ah mizawngte’ adingin pawilianpi khat bawlin, na tampi a hawmkhia uh hi. Tu-in a nih un lawpna, nuamna leh lungdamna tawh kidim ahih manun, a meel uh a kilamdang hi. Thu a ngetkhop uh ciangin, itna leh nuamna khitui a luangsak kha zel uh hi.
Lamdang tak leh thuthuk takin mawhcilna a nei lo Pasian’ Nu hong suahni dong, Vanlian Pasian in Tonu’ nu le pate tua bangin siansuahin a puahkhol hi.
Zingsol