Misiangtho Jerome Emiliani Pawini. (February – 8)

Somaschan Siampi te kipawlna a phuan ahi, Jerome Emiliani in Italy gam, Venice khua ah 1481 kumin suak hi. Jerome pen a pil mahmah galkap bu khat hi a, Treviso khua ah tavuan ki pia hi. Tua khua ah gal lel ahih manin a gal te khut sung tunga sikkhau tawh henin thong sungah ki khum hi. Tua thong sungah ama nuntakna hoihtakin ki sittel zo hi. 

Tonu Maria ii huhna hangin a lamdang takin tua thong sungpan suahtakna a ngah khit ciangin a ma nuntakna Pasian tungah ap dingin khentat hi. Jerome in Kum (37) aphak hunin siampi suahna ngah a, ama neih leh lamh te mizawngte piakhia hi. Tagah naupangte, zato te leh paktatna pan a kikhel kik numeite ading, inn te lamsak hi. 

1532 kumin Milan khua leh a nai aom khua khat ah Siampi kipawlna phuankhia hi. Tua kipawlna ii ngiimna in tagah naupang te kem ding, khangno te pilna hilh ding leh Siampi suak cil te lamlak ding cih te ahi hi. 

Jerome in Siampite kiangah hi bangin gen ngei hi. “Christu in note zawngkhalna, lungkiatna, nawlkhinna, lungkhamna leh mite’ kosiatna te a thuak dingin sathau hong nilh hi. Pasian khat bekin gentheih haksatna te ii thu bulpi thei zo himah taleh eite’ theih zawh thu nam (3) om hi. Tua te in-

1. Pasian in note pen ama it ta te sungah hong ki hel sak nuam ahih manin hi bang lampi te zangh in note hong siangtho sak hi.

2. Pasian in note pen amah leh amah lo ngal a dang kuamah hong um sak nuamlo ahih man hi.

3. Pasian in note pen mei sungah suai a kisit bangin hong sit tel ahi hi.

Hi bang gentheih haksatna te tawh na kituak hunin na upna sungah kip leteh Pasian in nang ading, lungnopna thupha pen hi leitungah bek hilo, tawntung nopsakna hong pia ding hi.” 1537 kumin pul natna vei mite a huhna pan Jerome zong natna kilawh in si hi. Misiangtho Jerome Emiliani pen tagah naupang te acing akem misiangtho hi

Misiangtho Jerome Emiliani aw…Kote adingin thu hong ngetsak in.