Misiangtho Helena

Misiangtho Helena in Kumpi Constantine ii Nu hi. Amah pen a kiniamkhiat mahmah numei khat hi-in Constantius tawh ki teeng uh a, aki tengzawh uh kum (20) khit ciangin Constantius in Emperor kumpi za ngah hi. Tua ciangin gam vai hangin amaute nih ki khen uh a, atapa uh Constantine in anu tawh om khawm hi. Constantine emperor kumpi a suah ciangin anu Helena pahtawina pia hi.

AD 313 kum ciangin Helena in a etteh huai Christian khat hong suak hi. Helena in upna thu te hoih takin midangte tungah hawmkhia zo hi. Europe gam sungah Biakinn tampi lam zo hi. Kum 72 aphak ciangin asiangtho leitang ahi, Jerusalem ah thungen dingin pai hi. Amah in Bethlehem khua ah Tonu Maria suahni pahtawina Tonu suangbuk khat lam a, Jerusalem khua gei a om, Topa Jesu Vantung ah a kahtohna mual tungah suangbuk khat lam hi.

Roma ah a om ama kumpi innpi pen Biakinnpi khat ahi “Santa Cruce in Cerusalemme” ci-in laih hi. Tua biakinnpi ah Topa Jesu ii Singlamteh leh Pilate kumpipa gelh lai te ki kem hi. Misiangtho Helena in AD 330 kumin si a, amah pen phim leh siktukilh abawlte ahuh Misiangtho hi.