Misiangtho Ephrem Pawini. (June 9)

Misiangtho Ephrem in 306 kumin, Syrian gam Nisibis ah suak hi. Kum (18) aphak hunin Catholic Pawlpi sungah tuisawpna Sacramentu a sanna hangin Pasian umlo a nulepa te in amah inn pan hawlkhia uh hi.
Tua pan Ephrem in Nisibis Siadaw St. Jacob kiangah pai in 325 kumin Siadawpa tawh Nicaea thukikupna ah zui hi. 350 kum, Nisibis pen Persia te khutnuai ah a tun ciangin Ephrem in Edessa gei aom, mi a tun khol lohna mualtungah amakia omin nakpitak in kidekna tawh a nuntakna kalsuan hi.
Tua munah Ephrem in Kha lam khantohna nading lai te leh Laisiangtho khiatna tampi gelhin om hi. Ephrem in Deacon a suah khit ciangin Siampi suah ding pen ama ii kiniamkhitna tawh nial hi. Ephrem in Edessa ah Pasian thu tangko zel aa, amanlo lamlahna te nialin Catholic upna pen hangsan takin kem in dal hi.
473 kumin Edessa ah kialpi tunga, mitampi te nek ding neilo in om uh ahih manin Ephrem in tua cimawh zawlkhal te huh ding leh panpihna nasep asem dingin amahlehamah ki piakhia hi. Tua bangin mizawngte a huhna ah Ephrem in a thaneih zah tawh hanciam in sem ahih manin a tha bei aa, ama om na mualtung suanghawm sung a tun zawh kha khat ciangin si hi.
Ephrem ii a lian pen minthanna in a siangtho Pasian phatna la te pen kikhopna, biakpiakna ah a zangh masa pen ahi hi. Tua ahih manin amah pen “Kha Siantho ii tumngai” ci-in minthang hi.
Misiangtho Ephrem aw….Kote adingin thu hong ngetsak tan.