Misiangtho Edward Pawini. (October 13)

Misiangtho Edward in England gam mi Kumpi khat ahi hi. Asiangtho mi khat in aminthanna in ama khutnuai mi te tungah thumanna, mizawngte hehpihna, thumanna leh si leh sa deihgawhna te azawh zawhna te hang ahi hi. Amah in ama van aguksak anasem khat (3) vei vilvel a muh hangin bang mah cih lo-in a van lak te tawh paikhia sak hi. Edward in “Mizawngte in kei sangin kham leh ngun te kisam zaw hi” ci hi. Kumpi huang mai ah a om, miphakte leh khutdawhngen te notset in thapiakna, amaute akhut tawh lenin thapiakna te nei zel hi. Edward in zingsang Missa cik mah in pelh ngei lo hi. England gam a om Pawlpi in Roma tawh akizop den na dingin zong Edward in thapia in hanthawn den hi.
AD 1042 kum, ama kum (40) cin kumin Edward in kumpi za ngah hi. Ama ii uk hun sung ahi kum (24) sungin England gam khangto mahmahin gammi te zong Edward ii ukna sungah lungnuam takin nungta uh hi. Gam sunga om Biakinn te zong hoih takin puahpha hi.
Edward in Westminster Abbey zateih sang lamna dingin ama kha sum sung pan sawm ah khat pia in inn mun leitang te zong piakhia hi. Tua banah Bawlung tual pi khat cia a pha biakinn pi khat zong lam hi. Tua mun pen England gam ii Kumpi te kumpi za a kipiakna mun, misi te a ding hun bawlna mun hong suak hi. Ahi zongin tua Westminster zateih sang hon pawi ah Edward in dam lohna hangin ki hel zo lo hi. AD 1066 kum, Edward a sih ciangin a luang pen Westminster zateih sang huang sungah ki vui hi.
Kum (40) a sawt khit ciangin a nasem te in ahan to kik in a et uh leh Edward luang kisia lo-in a om mu uh hi. 1163 kum, October 13 ni-in Edward ii luang pen gambup Funeral in nikhat sung bawlin nasia takin vui uh hi.
Misiangtho Edward aw…ko te adingin thu hong ngetsak tan.