Misiangtho Dominic Savio

Misiangtho Dominic Savio in Italy gam Riva khua ah 1842 kum April kha ni 2 ni-in suak hi. A pa Charles Savio hi-a, a nu Bridgid ahi hi. Dominic Savio kum 5 a phak-a kipan Missa sung ah (to serve Mass) tazathauh a kisin hi. Dominic Savio in kum 12 a phak ciangin St. John Bosco kiangah pai-in,”Siampi ka suak nuam hi,” ci-in va gen-a, a sawt loin amaute gel a kimaingap mahmah lawmta a suak uh hi. Dominic Savio in mi hehpih-in maitai ahih manin a sangkahpihte in a it mahmah uh hi.

Amah, lai hanciam mahmahin Pasian’ thu zong um mahmah hi. A dam lohna hangin tua sangah kum nih bek kah zo-a, tua khit ciang sang tawpin a inn ah a tawlnga hi. Amah in Siangtho Pumpi a sancil ni-a a bawl kiciamna thumeilette kipletin a zui tawntung hi. Tua kiciamna thumeilette in, (1) Keimah in mawhsutna leh Siagtho Pumpi sanna ka nei pahpah ding hi. (2) Pawlpi’ ciangtan pawi nite man nei takin ka kemcing ding hi. (3) Jesu leh Maria te ka lawm hoih pente ka suaksak ding hi. (4) Mawhna ka bawl sangin ka nuntakna ka piakhiazaw ding hi, cihte ahi hi.

Dominic Savio dam loin lupna tung ngakin a om laitak amah in, “A hoih mahmah nate ka mu hi,”ci-in a gen hi. Tua hun laitak ama kum 15 pha pan hi. Hih Dominic Savio’ tangthu, St.John Bosco’ gelh ahi hi. Dominic Savio, 1857 kum, March kha ni 9 ni-in si hi. 1954 kumin Pope Pius XII in misiangtho suak hi, ci-in tangko-a, khangnote a cing a kem misiangtho khatin zong kiciamteh hi.