Misiangtho Dominic Pawini. (Aug - 8)

Misiangtho Dominic in 1170 kumin Spain gam, Calaroga ah suak hi. Catholic Pawlpi sungah rosary khi thungetna hong kipatna in misiangtho Dominic tung pan ahi hi. Dominic te unau thum pha uh a, amah a neu pen ahi hi. Dominic a suahma in a Nu in pawi sim apai na pan zan mang khat man hi. Tua amang sungah ui khatin mei-am a kamah pet kawmin leitung lim khat a ang ah pom kawmin meikuang kawmkal ah tai tai hi. Tua ahih manin Dominic a suah ciangin Domini canis (Lord’s dog) cih khiatna anei, Dominic ci-in min phuak uh hi.

Dominic te unau a thum un Siampi suak uh a, a u Manes in Dominic ii phuat Dominican siampi suak in, a u khat ahi Antonio in Diocese siampi suak hi. Dominic in kum (7) a phak hunin a pu Siampi kiangah om in pilna sin hi. Tua hun pekpan in Dominic in zan a lup ciangin lupna tungah lum lo-in, sual tungah lum zel hi. A neu tung pankipan mite a hehpih thei mahmah khat zong ahi hi. Lam gei ah khutdawh ngen mite a muh ciangin Dominic in hehpihin na pia zel hi. A sangkahna ah a sia pipa in a sang naupangte kiangah Dominic ii a etteh huai sangnaupang ahih na thu gen den hi.

1191 kum in Spain gamah kial tungin mitampi in inn leh lo, nek leh dawn suplawh uh hi. Tua hunin Dominic in ama nikten puansilh te banah ama neih leh lamh khempeuh zuakin mizawngte ading piakhia hi. 1194 kum ciangin Osma a om, Benedictine kipawlna ah lut in 1201 kum in Siampi suak hi.

Siampi a suah khit ciangin Osma khua, Cathedal ah tavuan ngah aa tua lai ah St. Augustine ii thukhun zui-in om hi. 1204 kum, Denmork ah a paina pan Taulous Hotal neipa khat kikhel sak hi. Tua panin Dominic in Pasian thu gen na in ama lungsim thalawpna ahihna mukhia hi. Tua khit ciangin Dominic in Piantit gam aa om French Albigenses cih pawlpi khat a kikhel sak na dingin sawlna ngah hi.

Kum tawmkhat khit ciangin Dominic ii Pasian thu gen na hangin ahi zongin, ama ii a siangtho nuntakna hangin ahi zongin mi tampi Catholic sungah lut kik uh hi. Upna khial mite langpangna ah a guallel Citeaux khua, Zateih te kiangah Dominic in “Temta sangin thungetna tawh no leh no kidalna lum kisuan un. Puan hoih no no te sangin ki niamkhiatna silh zaw un” ci-in gen hi.

Khat vei, Dominic kiangah hi bang ahoih thu gen na te bang laibu sung pan sin na hi hiam ci-in a ki dot ciangin amah in “itna laibu longal a dang laibu pan hilo hi” ci-in dawng kik hi. Dominic in a lawm pawlkhat te tawh Taulous khua ah Ordo Praedicaatorum cih kipawlna khat phuan uh hi. Tua kipawl na aom mite in a siangtho lai te sinna leh Pasian thu gen na te semin kipiakhia uh hi.

Dominic in a pawlte kiangah Pasian thu leh Pasian tawh kisai kammal te bek gen dingin ngaihsut hoih pia hi. Dominic in Tonu Maria pahtawina tawh thungetna ahi, Khi thungetna a zang masa pen ahi hi. 1217 kum, Tonu Maria vantungah a kilaktohna pawini in Dominic in Dominican ki pawlna sunga a lawmte mun tuam tuam ah pai sakin “Eite in ih khaici te kem cing lo-in ih vawh ding hi” ci-in gen hi. 1221 kum, kum 52 aphak ciangin Dominic in Pasian nasepna hanciam takin a sepna hangin a tha bei in Bologna khua ah si hi.

Misiangtho Dominic aw…Kote adingin thu hong ngetsak in.