Misiangtho Cyril of Jerusalem Pawini. (March, 18)

Jerusalem khuapi ii Siadawpa ahi, Cyril in 315 kumin Jerusalem khua ah suak hi. Laisiangtho tawh kisai pilna te leh pilna tuamtuamte asin khit ciangin Siadaw Maximus khut tungpan Siampi suahna ngah a, 350 kum ciangin Siadaw dingin teelna ngah hi.
Tua zawh asawt lo in Cyril in amah thum vei vilvel gampua lamah ahawlkhia ahi Arian te tawh Pasian thulehla te kikupna leh kiselna te ah kihel hi. Arian te in Cyril pen mizawngte huhna dingin Pawlpi ii asiangtho puantual (vestments) zuak hi ci-in mawhsak uh hi.
Ahi zongin Cyril in tua Puantual (Vestments) te azuakna pen Pasian deihna bangin abawl ahi hi. 381 kum, the First Council of Constantinople in Pawlpi’ upna thu te atangko khiatna ah Cyril in Catholic Pawlpi’ upna ii Champion hi ci-in pahtawina leh zahtak piakna ngah hi.
Cyril ii anunung pen van in The Catechize cih amanpha mahmah laibu hi. Tua laibu in Tuisawpna Sacramentu ngah nadingin Pasian thu sinna ah aki zang mahmah laibu khat hi-in Laisiangtho munte zong khat leh khat kituak takin aki-at laibu zong ahi hi.
Mihing khempeuhin mopawi ah sapna ngah kimciat hi. Bang hang hiam cih leh Topa Jesu in cinghin mihing khempeuh it hi. Mipi tampi aom khop ciangin kuain mopawi sungah kihel thei ding cihpen mopi pa in khensat ding hi. Hih in Tuisawpna Sacramentu lim lahna hi ci-in Misiangtho Cyril in gelh hi. 386 kumin Misiangtho Cyril si a, Catholic Pawlpi’ upna thuthukte thuman takin kemcing ahih manin Doctor of the Church ci-in ki ciamteh hi.
Misiangtho Cyril aw…Kote adingin thu hong ngetsak tan.