Misiangtho Cyril of Jerusalem

Jerusalem khuapi ii Siadawpa ahi, Misiangtho Cyril in 313 kumin Jerusalem khua ah suak hi. Laisiangtho tawh kisai pilna te leh pilna tuamtuamte asin khit ciangin Siadaw Maximus khut tungpan Siampi suahna ngah a, 350 kum ciangin tua Siadawpa munah vaipuak apna ngah hi. Tua zawh asawt lo in Misiangtho Cyril in amah thum vei vilvel gampua lamah ahawlkhia ahi Arian te tawh Pasian thu leh la te kikupna leh kiselna te ah kihel hi.

Arian te in Misiangtho Cyril pen mizawngte huhna dingin Pawlpi ii asiangtho puantual zuak hi ci-in mawhsak uh hi. Ahi zongin Misiangtho Cyril in tua Puantual azuakna pen Pasian deihna bangin abawl ahi hi. 381 kum, the First Council of Constantinople in Pawlpi’ upna thu te atangko khiatna ah Misiangtho Cyril in Catholic Pawlpi’ upna ii Chapion hi ci-in pahtawina leh zahtak piakna ngah hi. Misiangtho Cyril ii anunung pen van in The Catechize cih amanpha mahmah laibu hi.

Tua laibu in Tuisawpna Sacramentu ngah nadingin Pasian thu sinna ah aki zang mahmah laibu khat hi-in Laisiangtho munte zong khat leh khat kituak takin aki-at laibu zong ahi hi. Mihing khempeuhin mopawi ah sapna ngah kimciat hi. Bang hang hiam cih leh Topa Jesu in cinghin mihing khempeuh it hi. Mipi tampi aom khop ciangin kuain mopawi sungah kihel thei ding cihpen mopipa in khensat ding hi. Hih in Tuisawpna Sacramentu lim lahna hi ci-in Misiangtho Cyril in gelh hi. 386 kumin Misiangtho Cyril si a, Catholic Pawlpi’ upna thuthukte thuman takin kemcing ahih manin Doctor of the Church ci-in ki ciamteh hi.