Misiangtho Cyril of Alexandria Pawini. (June 27)

Misiangtho Cyril in 370 kumin Egypt gam ah suak hi. Siampi a suah khit ciangin Cyril in a Pu ahi, Alexandria khua Siadawpa huhin om aa 412 kum in Alexandria khua Siadawpa’ za laih hi. Cyril in Tonu Maria in Pasian Nu ahihna a nial mite, langpang in Tonu Maria ii Pasian’ Nu ahihna thu akep a dalna hangin minthang mahmah hi.
Nesturius in 428 kum in Constantinople khua ii Siadaw dingin teelna a ngah khit ciangin Topa Jesu in Pasian hihna leh mihing hihna hihna namnih tawh a omna leh Tonu Maria in Pasian’ nu ahihna te langpang in thuzuite hilh hi. Tua bangin Nesturius ii thu hilhna te Cyril in sang zolo hi. Tua ahih manin 432 kumin a kibawl Council of Ephesus kikhoppi ah Cyril makai in tua kikhoppi na pan Pawlpi a ki khenthangsak ahi Nesturius pen Pawlpi sung pan hawlkhia hi.
Cyril in Catholic upna a dal lai tampi gelhna tawh ama nuntakna hoih takin azat khit ciangin 444 kumin si hi. Cyril in upna tawh kisai ahih nak leh hangsan takin a dal bek thamlo in lai manpha tampi gelhin hong nusiat hi.
Misiangtho Cyril of Alexandria aw…Kote adingin thu hong ngetsak tan.