Misiangtho Columbanus (November 23)

Misiangtho Columbanus in 563 kumin Ireland gam, West Leinster ah suak hi. Khangno khat ahih bang mah in nungak tampi te in amah hopih nuam uh hi. Tua ciangin Columbanus in lungsim singtho numei khat kiangah pai in ngaihsut hoih huhna ngen hi. 
Tua numei nu in nungakte oltakin pelh zo dingin ki um na hi hiam? Eva mai ah gual lel Adam thu phawk lo nahi hiam? Dalilah hangin a thahatna a bei Samsung, Bethshaba ii hoihna sungah ze-etna athuak David, numei te ii it na tawh khemna a thuak Solomon cih te phawk lo na hi hiam? Mi tampi a kiatna hih gunpi pan tai khia in ci-in numei nu in gen hi. Tua ciangin Columbanus zong a innkuanpih te nusia in zateih sangah lut hi.
Kum (45) a phak ciangin France gam, Italy gam te ah pai in Pasian thu tangko hi. Tua ban ah thu khun khauh mahmah zateih sang te zong lam hi. Numei te leh lengla te zateih sang sungah lut sak lo-in, zateih te in zong amau nasep tawh a kituak an bek ne in om uh hi. 
Amaute in Pasian a phawk tawntung nang uh leh leii tawh a ki bawl thei mawhna te a pelh zawh na dingun a nikhat hun ii a tamzaw pen lung nop loh na tawh om uh hi. Columbanus in “mihing te in midangte thu kikupna, midang te gensiatna, midangte mawhsakna te lo buang bangmah lunggulh lo hi. Thu hoih leh thu hoih lo khentel theihna kam leh leii a nei lo mi-in dai takin om zaw leh hoih zaw hi. Ahih kei leh amaute gen thu te in ki-it kilemna a khangsak thu hi ta hen” ci-in gen hi. Columbanus in 615 kumin Bobbio zateih sangah si hi.
Misiangtho Columbanus aw…Ko te adingin thu hong ngetsak tan.