Misiangtho Clare Pawini. (Aug 11.2022)

Misiangtho Clare in 1193 kum in, Assisi khua ah suak hi. Kum-19 aphak in Vuahun tawh kisai St. Francis thu gen khat lunglut lua ahih manin Pasian ading kipiakhia dingin Portiuncula biakinn ah alawm khat tawh a innkuan pihte’ theihloh kalin pai sim uh hi. Portiuncula biakinn atun uh ciangin Francis in na dawn hi. Tua ciangin Francis in biakna tau gei ah Clare paipihin “hih munah bang hih dingin ong pai na hi hiam?” ci-in adot leh Clare in “nong panpihna tawh Pasian hehpihna a zong ka hi hi” ci-in dawng kik hi.
Tua mun panin Clare in leitung gualnopna leh vangliatna te nusia in Pasian nasem dingin ki pumpiak na nei aa, amanpha mahmah apuan silhte, a kizepna suangmanphate, suaikhi, zungbulhte suahkhiain asau ditdiat a sam tan in puana akikhui thang ip-pi khat silhin om hi. Tua khit ciangin Francis in Bastia Benedictine nungak siangtho sangah om sak hi. A nulehpa leh ameltheih te in asamkik dingin hong pai ciangin Clare in Singlamteh len kawm in ken Topa Jesu lo buang pasal nei keng ci hi.
Tua ciangin anulepa te in Clare in Pawlpi sung nasep haksatna leh gentheih thuaknate sawtpi thuak zolo ding aa, lungkiain ong ciah kik pah lel ding hi ci-in lam-etna tawh ciah san kik uh hi. Clare in ahih leh haksatnate thuak zolo cih tahdah khauhtakin akipiak zawhna leh a nasepnate in anaunu Agnes lungsim nangawn lazo zaw behlap in anaunu zong a u mah bangin Pasian nasem dingin hong ki-ap hi. Anulepate in na sa lua mahmah uh ahih manin galkap honkhat tonpihin a tanute sam kik dingin pai uh hi. Clare te om na Convent huang sung atun uh ciangin Agnes pen nakpitakin sat in a utlo pi mahin kaikhia in ciahpih sawm uh hi.
Tua bangin kongkhakpi lam ah Agnes ut lo pipi in a talkhaihna uh amuh ciangin Clare in lungkham patau takin Pasian tautunga Topa Jesu kikhaina Singlamteh mai-ah boksukin lungsim takpi tawh Pasian hehpihna ngen in om hi. Tua leh thakhat thu in galkapte kaih tal zawh loh zah dongin Agnes gik vat ahih manin galkapte in a cih nading uh thei nawn lo hi. Tua kawm mahin apa te in sat sat lai uh aa, ahi zongin asat te thagui kitat bangin na sa gawp in tang thei nawnlo uh ahih manin lamdang sa in lau mahmah uh a, manlang takin ciah san vingveng uh hi. Tua ciangin Clare leh Agnes te unau in Pasain in amaute a kepnate hangin lungdam ko in thu ngen uh hi. Tua thu te Assisi khuapi sung leh a kiim apam tengah ki zel pahin minthang mahmah hi.
Hun hoih khat angah ciangin Clare in alawm pawlkhat te tawh kipawlna dang khat phuan in St. Damiano sang gei ah om uh hi. Poor Clare ci-in mi te theih amau te in zawngkhal na leh khauh tak in kisikkik nate tawh nungta in kalsuan uh hi. Amau te in khedap bulh lo in vak kawikawi na, ni sim ki dek na te bawl in kua mah tawh ki ho lo in om uh hi. Vaipuak khat leh it na bek in pau uh hi. 1228 kum in Pope Gregory IX in St. Clare a khauh mahmah zawngkhal na pan suahtakna a piak ciangin amah in “kei in mawh na pan suahtakna ka ngah nading ka kisap hang, Topa Jesu nungzuihna pan suahtakna ngah ding ki sam lo hi” ci in dawng hi. Tua ciangin Pope in Privitegium Pauperitatis amau te pia hi.
1224 kum in Frederick II galkap te in Assisi khua sim dingin hong pai ciangin Clare in Siangtho pumpi a om Singlamteh tawi in amau te a mu dingin pai hi. Tua ciangin alamdang mahmah vang khat in thakhat thu in galkap te mancip a hih manin galkapte zong kuamah bawl sia lo in kilehkik uh hi. 1253 kum, a sih ma deuh in Clare in “Kei mihing in nong piangsak manin Pasian aw na tungah thupha om tawntung ta hen” ci-in gen hi. Alawmte kiangah zong “Pasian ei te tawh om tawntung hi cih akuama ciatin i mang ngilh ngei loh ding thupi pen hi” ci-in hanthawn den hi. A sih ciangin St. Damian han ah ki vui hi. Misiangtho Clare pen mitnate ahuh leh khua hun hoih ngah nading ong huh Misiangtho in ki ciamteh hi.
Misiangtho Clare aw… Ko te adingin thu hong ngetsak tan.

Add new comment

3 + 0 =