Misiangtho Christopher Pawini. (July – 25)

“Christu Topa apua pa, Christopher”

A lianpen pa kiangah nasem nuam ahih manin galkap lut a, a sia ding a zon na ah satan pen a lian pen sakha in sia za a pia pen Christopher hi. Amah pen Catholic pawlpi sungah a minthang mahmah misiangtho khat hi. Christopher in koi munah suak in a nu leh pa te kua te hiam cih a ki theih loh hangin amah pen a tun sangin a thahat mahmah pasal citak khat hi.

Christopher a tangval no lai nikhat in a lawmte in gamlak ah singkung in adelh khak tuu no khat hotkhiat ding a hanciam uh hangin singkung liik zo lo uh hi. Tua lai takin Christopher hong tungin tua singkung liik ziau in tuu no honkhia zo hi. Tua bangin Christopher pen a hat mahmah tangval khat ahi hi.  Ama min tak tak pen Reprobus hi.

Reprobus in khua sungah galkap a lut hangin ama kumpi pa in a lianpen hi lo ahih manin a dang kumpi khat kiangah galkap sem dingin pai khia hi. Kumpipa mai a tun ciangin kumpipa in bang hangin hi lai ah na sem nuam na hi hiam ci-in a dot ciangin Reprobus in a lian pen kumpipa kiangah na ka sem nuam hi ci-in gen hi.

Kumpipa in zong ama genna sang pahin tua lai ah Reprobus in kum tampi galkap sem in om hi. Ni khat ciangin kumpipa in ama mai ah a mite khat la sa dingin sawl hi. Tua lai ah kumpipa in Pasian phatna la a ki sak ciangin singlamteh ciaptehna bawl hi. Tua thu a mu Reprobus in kumpipa kiangah bang hangin tua bangin bawl na hiam ci-in a dot ciangin kumpipa in dawng lo hi. Tua ciangin Reprobus in nong gen kei leh hi lai ah na sem nawn kei ning ci hi.

Tua ciangin kumpipa in amah sangin a lian zaw Christu Topa phawkna in singlamteh ciaptehna a bawl hing ci-in a gen ciangin Reprobus in tua a lian pen pa a zong dingin a galkap sepna pan khawl hi. Tua bangin a lian pen pa a zon zon na ah satan tawh ki tuak hi. Reprobus zong tua satan pen a lian pen sa-in “My lord, my lord” ci-in a kam pan gen khia hi. Tua bangin Reprobus in hoih lohna te tawh satan kiangah nasem in om hi.

Ni khat ciangin a sia pa satan tawh sakol tung tuangin pai khia uh a, lam kal ah singlamteh khat satan in a muh ciangin pai suak nawn lo-in kilehkik hi. Reprobus in bang hangin kileh na hiam ci-in a dot leh satan in bang mah hi kei acih hangin Reprobus in nong gen kei leh na kiang pan pai khia ding hing a cih ciangin satan in tua pen Christu Topa hi in amah sangin a liat zawkna thu a gen ciangin Reprobus zong satan kiangpan pai khia in Christu Topa a zong dingin kipan hi. Tua hun in ama kum zong tam to to ta hi.

Tua bangin Christu Topa zong dingin a puan te tunin apaikhiat na ah Sehnel gam a tun ciangin naupang no khat mu hi. Tua naupang kiangah Reprobus in Christu min nei mikhat koi ah zong ding ka hi hiam ci-in dong hi. Tua naupang in zong singlamteh tunga si pa maw ci-in a dot kik ciangin Reprobus in hi mah ci-in dawng kik hi. Tua naupang in zong ka pa gen na ah Christu in tuipi sungah om hi ci hi, ci-in gen hi.

Tua ahih manin Reprobus in mi amuh khempeuh kiangah a dot hangin kua mah in gen thei lo uh hi. Ahi zongin amah pai suak a mun khat ah buuk no khat mu hi. Reprobus zong tua buuk sungah kua om hiam cih thei nuam ahih manin apai saisai leh lampi ah ki taalin tuk hi. Tua bangin a ki taal laitak vantung pan ‘aw’ khat a za danin ki ngaihsun hi. Tua ciangin a tung lam a et toh leh zateih khat mu in, tua zateih pa in “tho in tho in” ci-in tho to in sawl hi. Tua ciangin Reprobus in den a ka zak ‘aw’ pen nang aw hiam ci-in a dot leh zateih pa in hi kei, kei bang mah pau keng ci’n a dawng khit ciangin tawl tuak lua cin buuk sungah va tawlnga in ci-in Reprobus tawlnga sak hi.

Tua buuk ah zateih pa in Reprobus pen ni sawt pi om sak hi. Tua lai ah zateih pa’n thu anget ciangin “O Jesu” a cih pen Reprobus in za ahih manin lunglut sem sem hi. Tua mun ah zateih pa in nisim in Topa Jesu thu Reprobus gen hi. Tua ciangin Reprobus in a lian pen kua hiam cih thei tel ta ahih manin ama nuntak sung tawntung tua a lian pen pa kiangah nasem ning ci-in a tem a paai pan dawkkhia in ki ko hi. Zateih pa in Pasian ading ki piak khiatna ah tem kisam kei ci-in nuihsan hi. Tua ciangin Reprobus in tua leh ken bangci bangin a ma nasem ding ka hi hiam a cih leh zateih pa in a masa pen in Topa Jesu kiangah thu ngen in ci-in hilh hi.

Zateih pa in Reprobus kiangah nang a thahat mah mah khat na hih ciangin nong pai laitakin gun khat mu kha hi lo na hiam ci’n dongin, tua gun in thuk mahmahin lau huai hi. Khuapi sung a pai nuam te in tua gun a kan kul a, khua hun hoih loh lai tak hi leh tua gun kan dingin a hanciam mi tampi si uh hi. Pasian na nasep nop leh hi gun gal pan gun kantan ding a haksa mi te na liang tungah pua in nisim in huh thei ding hi teh ci-in gen hi.

Ni tak khat ciangin nasia takin guah zu a, van nasia tak athum lai takin a ih mu Reprobus in “Reprobus” ci-in sapna aw khat za ahih manin amah zong tho to in kong khak a va et leh bang mah mu lo ahih man in lum kik hi. Anih vei na ama min a ki sapna za leu leu in tho in a et leh lah bang mah mu tuan lo hi. A thum vei na ciangin a et leh naupangno khat mu hi. Ahi zongin Reprobus in tawl/gim ahih manin pai khia nuam lo hi. Ahih hangin guah zu nuai a om naupang a et ciangin hehpih huai sa kik ahih manin pai in a liangko tungah pua in gun gal ah kha ning ci’n khentat hi. Tua bangin naupang a liangko ah pua in gun a kan lai takin naupang pen dam dam in gik sem sem hi. Naupang a gik luat cingin gun tui sungah tui kia dektakin a om lai tak Reprobus in tha hatna tawh hong kidim sak Topa Pasian aw ci-in a kam pan awng khia hi.

Tua bangin a gik mahmah ciangin Reprobus in ki ngah nawn kei ci-in a awt leh naupangno in ngah mah ci-in dawng kik a, zong ki ngah takpi in gun gal lang khat ah tung hi. Gun gal lang khatah a tun ciangin Reprobus in a gik semsem naupang pen a et leh Christu Topa na na hi hi. Tua thu Reprobus in um zo lo-in a om lai tak, Christu Topa in “hi mah hi, kei in Topa Jesu hing” ci-in gen hi.

Tua hun in tua lai mun mah pan Topa Jesu mahmah in Reprobus pen tuisawpna pia in Reprobus min pen Christopher ci- in pia hi. Tua hun pankipan Christopher in tua lai ah mite huhin om a, mite in zong amah deih thei mahmah in ama hoihna thu zong thang sem sem hi. Christopher pen AD 251 kumin si hi. Misiangtho Christopher pen khualzin te a huh misiangtho in ki ciamteh hi.

Misiangtho Christopher aw…ko te adingin thu hong ngetsak in.