Misiangtho Cecilia Pawini. (November 22)

La siamte ahuh Misiangtho Cecilia in kumzalom 2 hunin Rome ah suak hi. A nulehpa te pen mihau ahih banah kumpi ulian khat zong hi uh aa, Christian a suaksimte ahi uh hi. Cecilia in Khantawn pasal neilo dingin khensat in a kiciam hangin a nulepa te in Valerian a kici tangval khat tawh teeng sak tentan uh hi. Mopawi bawl hunsung mahin Cecilia in alungsim sungah Pasian phatna la sa in om hi.
A khan sunguh ah atawlngak ciangun, Cecilia in Valerian lungsim ki khel sak aa, nupa bangin omkhop loh ding thukim uh hi. Valerian in tuisawpna asan khit ciangin mang khat mu hi. Tua amang muhna ah Vantungmi khatin Cecilia geiah dingin Lingpaak tawh akibawl paakkual khat, Cecilia ii lungtungah a khuksakna mu hi. Cecilia in Valerian ii naupa Tiburtius zong kikhel sak zo hi.
Tiburtius in tuisawpna a san nitak akipan Valerian tawh a unau un zankim laitakin vaak khia in Rome kumpi in a thah Christiante luang te la simin phum sim uh hi. Tua in amau nasep ahi hi. Tua bangin a nasepna uh kumpi ulian khat in na mu sim ahih manin kumpipa kiangah gen pah hi. Kumpipa in a theih ciangin heh lua ahih manin thu tam dong nawn lo-in a unau un a ngawng uh tansak hi.
Amau sih khit ciangin Cecilia in Pope Urban tawh kithuah in Christian si khinte luang pen zan kim laitakin va kaikhawm in phum uh hi. Kumpipa in a theih ciangin heh mahmah a, a inn ah Cecilia sam in, “Thu tampi hong gen kei ning. Ka Pasian ahi suang tawh a kibawl Jupiter lim maiah meihal biakpiakna va bawl in. Tua hi leh kong that kei ding hi” ci hi.
Cecilia in Jupiter pen Pasian hi lo hi. Bia lo ding hing a cih hangin kumpipa in thudon sak lo in biakinn nasemte honkhat tawh Jupiter biakna innpi ah pai sak hi. Lamkaal ah Cecilia in kumpipa nasemte a nungta Pasian thu genpih ahih manin a vekun a lungsim uh kikhel in Christian suak uh hi.
Kumpipa heh semsem aa, hei mawl khat tawh Cecilia ii angawng pan thum vei satin sidektakin koih uh hi. Nithum sung Cecilia in thuak zo lai aa, a nithum ni ciangin si hi. Cecilia asih ciangin aluang pen St. Callistus hanah vui uh a, hun khat ciangin Trastevere a om, St. Cecilia biakinn ah tuah kik uh hi. 1599 kum ciangin Cecilia ii luanghawm kisia lo-in a ihmu bangin a om ki mu hi.
Biakinn sungah a kitum Organ pen Cecilia ii bawlkhiat, ama pat khiat ahi hi. Tua ahih manin Cecilia lim a kisuaih nak leh Organ a tum laitak leh a lutung ah Lingpaak lukhu kikhusak in, a gei ah vantungmi khat om sak den uh hi.
Misiangtho Cecilia aw…ko te adiangin thu hong ngetsak tan.