Misiangtho Catherine of Siena (April 29.2022)

Misiangtho Catherine in 1347 kumin Italy gam, Siena khua ah suak hi. Kum 6 aphak hunin Topa Jesu ama kiangah ki langh a, tua pankipan Catherine in a nuntakna Pasian kiangah ap hi. Kum 12 a phak ciangin a nulepa te kiangah cik mah hunin pasal nei lo ding hing cih alah na in a sau mahmah leh a hoih mahmah a sam tan hi.
1365 kumin nungak siangtho sangah lut aa, kideekna leh thungetna tawh nungta hi. Catherine in dawi ze-et nate thuak den a hih manin “Ka Pasian aw ka kha in ze-et na te thuak in a gentheih laitak in nang koi ah om na hi hiam” ci-in thu ngenin kap hi. Tua ciangin Pasian in “kong it ka tanu aw..na lungtang sungah kei ka om a, ka thupha te tawh tha kong pia den hi” ci-in dawng kik hi.
1366 kum, Catherine in a khan sungah thu ngenin a om laitak in Topa Jesu leh Tonu Maria te, vantungmi te tawh a ma kiangah hong ki langh uh hi. Tonu Maria in Catherine ii khut len in Topa Jesu kiangah pia aa, Topa Jesu in zong Catherine khut me ah zungbulh bulh sak in tha pia hi. Hih kha thu sungah ki teenna in Catherine ii mipi maiah Pasian na asepna limlahna ahi hi.
Catherine in thong kia te leh adamlo mite kem khoi den hi. Tua banah Siangtho Pumpi mai ah sawtpi tak thungen in mawhna sungah a kidiah mite leh thunget ding a thadah mite a kisikkik nangun thunget sak den hi. Ahi zongin mi te in amah mi hoih a kineih khem, a hai hi ci-in thuman lo pi-in lang pang uh hi. 1375 kumin St. Christina biak inn sungah thu ngen in a om laitak in Catherine in Topa Jesu ii liamma te ngah hi.
Tua hun in Catherine gam sung buaina te a bei na dingin zong hanciam hi. A lianbel Siampipa leh gam uk te kikal ah ki lemkikna ngah na dingin zong hanciam hi. 1376 kumin gam vai hangin Rome pan a paikhia Pope Geglory XI pen Rome ah a ciah kik na dingin Catherine in thum hi. Catherine in kilem nading ahan ciam tawntung khat ahi hi.
Catherine in Pasian leh Kha kihona (Dialogue) cih laibu gelhna tawh ama nuntak hun nunung bei sak hi. Tua laibu pen Khasiangtho makaihna tawh a gelh banah alunglut huai mahmah lai bu tampi gelh hi. Alian bel Siampipa in leitung bup tawh ki sai Pawlpi’ Makai pi khat ii din mun dingin Catherine vaipuak ding a gen laitak, Catherine in Pope pen “PaPa” ci-in sam hi. Catherine in amah leh amah Pawlpi tuuno in a ki-ap khitzawh, kum 33 a phak hunin lungmuang takin si hi. Misiangtho Catherine pen pulnatna tuamtuam te leh lutang natna anei te ahuh Misiangtho ahi hi.