Misiangtho Bridget o

Misiangtho Bridget in 1303 kumin Sweden gamah suak hi. Aneu tung pankipan ama nuntakna sungah thu lamdang tampi tuak hi. Amah in St. Theresa of Avila bangin Pasian thu lungngaihna leh ama nasepte lawptakin sepna tawh athuthuk nuntakna anei khat ahi hi. Kum (14) aphak ciangin kumpi nam ahi, Ulf Gudmarsson tawh kiteengin ta (8) nei uh hi. Amaute’ tanu ahi, Katherine of Vadstena pen Misiangtho suak in, a tapa uh khat ahi Charles ahih leh gamtat sia in aminthang khat hi aa, anulepa te’ lungkhamna lianpi khat ahi hi.

1335 kumin Bridget pen Sweden gam kumpinu’ ii zalaih dingin teelna ngah hi. Kumpipa in ama nasepna leh kumpi innkuante tawh na asepkhopna hangin inn mun pawlkhat leh nungak siangtho sang dingin inn pawlkhat pia hi. 1344 kum, a pasal asih khit ciangin Bridget in “Vadstena ah the religious Order for the Holy Savior” asiangtho honpa adingin nasemte cih kipawlna khat phuan hi.

Asawt lam ciangin Bridget Roma ah kituahin tua lai ah ama ii nuntakna sungah a tuahkhak thu lamdangte gelh in damlote leh micimawhte huhin om hi. Ama phuatsa kipawlna (Congregation) sungah sumlehpaai haksatna tawh buaina aom ciangin Bridget in gimpi tawlpi mah in nasep hanciam hi.

Khat vei, Jerusalem ah tuilam tawh apai na ah Tembaw kisia bek tham lo, a lungkham mahmahna atapa si cih thu za hi. Tua thu te in ama cidamna nakpi in susia hi. Amah Roma ah ciah kik in 1373 kumin si hi. A tanu Katherine in anu’ nasepna te zom suak aa, The Brigettine Order ci-in mi tampi in thei uh hi. Tu laitakin leitungah Brigettine nungak siangtho sang (12) om ta hi. Misiangtho Bridged pen meigongte ahuh misiangtho in ki ciamteh hi.
Misiangtho Bridget aw…Ko te adingin thu hong ngetsak tan.