Misiangtho Blaise Pawini. (Febuary 3)

Misiangtho Blaise in Armenia khua pi ah mihau mahmah innkuan sung pan suak hi. Christian pilna te hoihtak a sin khit ciangin siavuan khat suak hi. Tua khit ciangin Siampi sinna sangah lutin Siampi a suahzawh a sawt lo-in Siadaw suak hi.
Licinius in Christian te a bawlsiat mahmah hunin Blaise in zatui pia-in, thupha apiak ganhingte omna suanghawm ah amah kibu hi. Pawi lahna ah lah dingin ganhing a zong gamvakte in Blaise mu uh aa, manin kumpipa kiangah puak uh hi. Tua bangin kumpipa kiangah apaina uh lampi ah Nupi khatin a lawngah Nga guh awkin a si dektak a tano khat Blaise kiangah hong paipih in thupha ngen aa, ama thungetsakna hangin tua naupang dam pah hi. Tua pankipan Blaise pen ngawng/ Tawl na cih damlohna te ah Misiangtho Blaise ki beel den hi.
Tua khit asawt lo-in simmawh bawlsiatna te upna tawh thuakin sik zum tawh avunte hawkkhiatsakna a thuak khit ciangin thahna thuak hi. Misiangtho Blaise pawini sialin thupha a kipiasa khuaimeivak nih pen Singlamteh bangin bawlin thuzuite ngawng ah Siampite in thupha pia den aa, tua laitakin “Siadaw leh Upna hangin thahna a thuak Misiangtho Blaise ii thungetsakna hangin Pasian in na Tawl sunga na thuak natna te leh hoih lohna te pan hong hon ta hen. Pa, Tapa, Kha siangtho min tawh. Amen” ci-in thunget sak hi.
Misiangtho Blaise aw…Ko te adingin thu hong ngetsak tan.