Misiangtho Bernadette Pawini. (April – 16)

Tonu Maria ki lahna a mu, Misiangtho Bernadette in Piantit gamah 1844 kumin, nuntak haksa mahmah innkuan sung pan suak hi.
Kum (14) a phak hunin Bernadette ki ci naupangno nu mai ah puankang silh numei khat hong ki langh hi. A puantual kang tungah a dum khat tawh a kawng ngakin a khut sungah Rosary tawi hi. A lutung ah dial kang khat khu in a khe phungah Lingpaak te tawh Bernadette mai ah ding hi. Tua bang numei a mu ngeilo Bernadette in lamdang sa mah mah hi. Tua numei in amah leh amah “Kei-in mawhcilna neilo apiang Tonu” ka hi hi ci-in gen hi.
Tua ni pen 1858 kum, February 11 ni ahi hi. Tua hun a tun ma kumin Pope Pius in Tonu Maria zahtak piakna in 1852 kumin, December 18 ni sim in Tonu Maria ii mawhcilna neilo apiang Tonu ahihna pawi bawl dingin tangko hi.
Bernadette in ama kiangah Tonu a kilahna thu mite a gen hangin kua mahin um lo uh hi. A nunglam ciangin Tonu cih kua cih zong hoih tak a thei tel nailo naupang khat in Tonu Maria lim ama muh bangin a gen na thu mite in hong um san uh hi.
Tonu in Bernadette mai ah (18) vei a ki lah hangin midang kuamah in mu lo-in, amah bek in mu hi. Khat vei, Tonu in ama kilahna suanghawm mai a ciiktui pen Bernadette dawn sak hi. Tua khit ciangin tua tui tawh khut leh khe a zaw mi khat in a khut a sil leh anatna pan dam siang hi.
Tonu in tam veipi a kilah khit ciangin ama kilahna munah biakinn lamsak a, thungen sakin kigualin paisak hi. Tua thu Bernadette in a Siampipa kiangah va gen hi. A sawt lo-in tua munah mi hong tam sem sem ahih manin tua Lourdes khua uk pa in tua mun khakcip hi. Tua bangin a khak kawmkal pan Bernadette in a gamla, suanghawm pualam pan Tonu galmuh veve hi.
Empiror kumpi Louis in tua a khak na mun hong sak kik in tua mun pen thungen mi tampi te tawh nasia mahmah hi. Bernadette zong 1866 kumin nungak siangtho sang lutin 1879 kumin si hi. Amah a sih hunin kum (35) pha pan hi.
Misiangtho Bernadette aw…Kote adingin thu hong ngetsak in.