Misiangtho Benedict Pawini. (11 July 2022)

Misiangtho Benedict in 480 kumin Italy gam, Norcia ah suak hi. Amah pen Misiangtho Scholastica tawh unau ahi hi. Benedict in a lawm te gamtat siatna te amuh ciang alung kham mahmah in kum 20 aphak ciangin mual tung khat ah amah bek Pasian thu lungngai in va om hi. Khat vei a mitkha ah nidanglai a ki theihpih ngei nungak mel hoih mahmah khat hong ki lang in lungsim ze-et na nasiatak in thuak hi.

Tua ciangin Benedict in apuan silh te suah khia in, apumpi ling tungah hual gawp hi. Hih bangin pumpi gimthuakna tawh akha na honkhia hi. Vicoverro zateih sangah amakai dingin sapna a ngah ciangin pai a, ahi zongin tua lai aom, zateih te in ama thukhun zui zo lo uh ahih manin that dingin hanciam uh hi.

Amaute in Leenggah zu hai sungah gu khah uh a, a hi zongin Benedict in Singlamteh ciaptehna a bawl ciangin tua lenggah zu hai ki tam in, amau thusim zong ki lang pah hi. Amau sang gei aom PhalawrenceTius min nei Siampi khat in zong pongmoh sungah gu khah in that dingin ahan ciam hi. A hi zongin that zo lo ahih manin numei paktat te tawh Benedict ii zateih te susia ding in han ciam leuleu hi. Benedict in tua bang ze-et na te a dal na dingin 530 kum ciangin Monte Cassino ah sang khat phuan leuleu hi.

Tua tak ah “Thu nget na leh na sep” cih thukhun tawh ki zui-in, nisim in zateih te in nai 8 sung thungen, nai 8 sung na sem, nai 8 sung ih mu, pawlpi tawh kisai lai sim nate leh KMSS na sep na te ni sim in sem in om uh hi. 547 kum, Benedict kum 66 hun in si a, 1220 kumin Pope Honorius III in Europe gam a kem misiangtho in tangko hi.
Misiangtho Benedict aw…Kote adingin thu hong ngetsak tan.