Misiangtho Bartholomew Pawini. (August - 24)

Jn 1: 45-51

Bartholomew a ki ci, Nathanael in Galilee gam, Cannan khua ah suak hi. Nungzui pi Philip in Nathanael amuh ciangin Nazareth khua mi Jesu ka mu zo uh hi ci-in a gen ciangin, Nathanael in ‘‘Nazareth khua pan na hoih khat hong piang thei ding ahi hiam?’’ ci-in dong hi. Nazareth in khua no khat hi-in, nidangin minthanna khat zong om ngei lo hi.

Itna lian semsem leh sila lungsim tawh ki piakhia nuam sem sem hi. Tua sila lungsim tawh a it mite lak ah Bartholomew zong khat ahi hi. Nuntakna sungah Topa Jesu na ih sep zawh na dingin it na kisam hi. It zawh nading in theih ding ki sam a, theih na dingin amah tawh ki muh ding kisam hi. Amah tawh ki muh theih na dingin ama kiangah pai ding kisam a, ama kiangah tun nading in ei mahmah kalsuan in ama kiangah ih pai ding kisam hi.

Tuni Bartholomew ii Pasian nasep kalsuan na ah theih loh na pan theih na ah, theih na pan itna ah, itna pen ama na sepna ah cih bangin Topa Jesu damdam in hong thei in hong tel in ama Pasian nasepna a nuntak hun bei dongin kem cing zo hi. Ama itna teci in ama nuntakna pen a hing tangpi in vun hawk na tawh lak khia hi.

Topa Jesu a theih ma in Philip ii lam lahna pan Bartholomew in Topa Jesu hong thei hi. Topa Jesu tawh a ki muh masiah pen ama nuntakna ah a ut bangin a gamta khat hi a, Topa tawh a ki muh hun pankipan it na lungsim tawh kikhel hi.

Topa Jesu in “en un! Hih lai-ah a sunga zuauna khat zong a om lo Israel mi taktak khat a om hi” ci-in tua pa’ thu gen hi.  (Jn 1: 47). Ni dang lai, lai-at siam te gen na ah aman India gam leh Armenia gam te ah lungdam na thu tangko in mi tampi milim biakna pan Christian biakna ah ki khel sak hi ci-hi. Tanglai upna teci sungah amah pen a hingpi in a vun ki hawkin a ngawng a ki tan ma in hun sawtpi natna thuak hi ci hi.

Misiangtho Bartholomew pen ci bawl te leh khedap bawl te, dekgui natna nei te ahuh misiangtho in ki ciamteh hi.

Misiangtho Bartholomew aw…kote adingin thu hong ngetsak tan.