Misiangtho Augustine Pawini. (August -28)

Hippo khua Siadaw ahi St. Augustine in AD-354 kumin, Africa gam, Thagaste khua ah suak hi. A nu in ama ading thu ngetsak den mahtaleh kum 17 a phak hunin, Carthage khua ah pai-in tua khua ah Pasian um lo pawlpi(Lawki) sungah lut a, paktatna tawh gamta in ta khat nei hi. Kum 29 aphak ciangin Italy gam ah pai in, tua lai pan Milan Siadaw pa ahi St. Ambrose thugenin alungsim sukha hi.

Ni khat aveng naupang khat la sak a za hi. Tua zawh ciangin a gei aom Laisiangtho hongin St. Paul laikhak khat sim kha hi. Tua in-“Topa Jesu Christu silh unla, na pumpi uh’ lunggulhna bangin gamta in om kei un” (Rome 13:14) cih kam mal ahi hi. Hih kam mal in Topa sungah alungsim ki khel sak hi. Kum 32 a phak hun, AD-387 kum, Paska pansik ni zanin St. Ambrose tungpan tuisawp na sang hi. Tua hun pan ki pan anuntakna Pasian sungah ap dingin khensat hi. A ma at lai bu khat ah “ni dang lai pek pan bek hi lo, a tawntung in ahoih den ka Topa aw, hun tampi a kheng khit ciangin kong it pan hi” ci-in gelh hi.

AD-395 kumin, Hippo Siadaw dingin teelna ngah a, a mah leh amah a hoih pen Tuu cing in hi ta leh lai at siam khat in hi ta leh te-ci lak hi. A mah in Siampi ki pawl na phuan in nungak siangtho te ading, charism leh thu khun te at sak hi. Thu zui te kiangah “no te adingin kei in Siadaw khat ka hi hi. A hi zongin no te tawh a ki bangin ci leng kei in thu zui mi khat ka hi hi” ci-in gen hi. Khat vei To Thum Pasian thu a lung ngaih lai tak, tui pi sunga tui te seh nel tungah dum no khat bawl in tua sungah a sungsuk, alam dang naupang khat a mu hi.

Augustine in tua naupang kiangah na na hih piang thei lo hi ci-in a gen ciangin naupang no in a ma kiangah “na lungsim ngaihsutna tawh Pasian hihna tel ding sangin gun sunga tui te dum sungah koih leng baih zaw lai ding hi” ci-in dawng kik hi. AD-410 kum, Roma Empiror a kiat ciangin Augustine in “Pasian gam” cih thulu tawh lai bu khat bawl a, Roma Empiror a kiat na in Christian thu zui te mawh na hang hi lo in ama mawh na hang in Pasian in mawhna dan a pia hi ci-in tua lai bu sungah gelh hi. AD-430, kum 75 a phak hun in Algeria gam, Annaba ah si hi.

Misiangtho Augustine aw…ko te adingin thu hong ngetsak tan.