Misiangtho Augustine Of Canterbury Pawini. (May - 27)

Misiangtho Augustine in Rome khuapi a om, Andrew zateih sang pan zateih khat ahi hi. 596 kumin Pope Gregory the great ii sawl na tawh Augustine leh alawmte, mi (30) in England ah Pasian thu tangko dingin pai uh hi. Amaute Kent a cih na mun atun uh ciangin Kumpi Ethelbert in vadawn aa, khuapi sungah sam nawn lo in tua lai ah om sak pah hi. Bang hang hiam cih leh amaute in mitphial leh aisannate a zat ding uh alau man ahi hi.

Amaute in ngimna hoih nei hi cih thu a theih ciangin kumpipa in amaute a muanna leh a upna tawh Canterbury ah mun pawlkhat pia aa, amaute’ deih na mun khempeuhah Pasian thu agen theih na dingun phalna pia hi. Asawt lo in mi tultampi in Christian sungah hong lut in 597 kum, Khasiangtho Pasian pawini-in kumpipa mahmah in zong tuisawpna sang hi.

Misiangtho Augustine leh apawl te in Pope tawh kizopna nei den uh a, “asiangtho a sanna munah akah to nuam mi in kal khat ta suanin kah to ding hi. Kal khat ta suan lo in kantan na tawh ki tung thei lo hi” cih, Pope thugen na zui-in kalsuan uh hi. Amaute in Dawi thoihna biakinn te susia lo in tua munte ah Christian thungetnate nget pih uh hi. Tua gammite ngeinate zong angei bangin om sak in dawi biakna pawinite ah Misiangthote pawini te bawl pih uh hi. Misiangtho Augustine in Canterbury ah Biakinn khat leh Sts. Peter & Paul tungah aki-ap zateih sang khat lam in tua gam sungah Diocese thak tampi zong hong hi. 605 kumin Misiangtho Augustine si aa, tua hun pankipan England gam acing akem Misiangtho in zahtakna ki pia den hi.
Misiangtho Augustine aw...Ko te adingin thu hong ngetsak in.