Misiangtho Anthony of Padua Pawini. (June 13)

Misiangtho Anthony in 1195 kumin Portugal gam, Lisbon ah suak hi. Kum (15) a phak ciangin St. Augustine zateih sangah lutin tua sang pan Siampi suak hi. 1221 kum, St. Francis zateih sangpan Pawlpi adding thahna athuak (5) te zatngei van te Morocco pan Portugal ah a kituah ciangin amauti khekhap zuih nopna lungsim nakpi takin khang hi.
Hun tawmkha a sawt khit ciangin Anthony in Africa a om Muslem te kiangah Pasian thu tangko dingin sawlna ngah hi. Tu alai atun zawh a sawt lo-in cina in gim mahmah ahih manin Portugal ah ciah kik pah hi. A ciahna lampi ah ama tuangna Tembaw pen Sicily ah tung hi. Tua pan Anthony in Assisi ah pai suakin St. Francis tawh ki mu hi.
Tua pan Forli a om mi a tam tun khollohna zateih sang khatah ki puakin kuang leh keu sil ding tavuan piakna ngah hi. St. Francis zateih te leh St. Dominican zateih te sung pan Deacon ngahna pawi bawl ding hun a tun ciangin amauti kikal aa ki telkhialhna hangin St. Dominican zateih te sung pan thu gen dingin kua mah kiging lo uh ahih manin amau tangin Anthony thu gen dingin sawl uh hi.
Anthony thu gen a za a tungsiahte in thu gen siam sa uh ahih manin Italy leh Piantit te ah Pasian thu tangko dingin sawl uh hi. Anthony a tun tun na ah ama thu gen a ngai dingin mi tampi hong ki khawm uh hi. Ama ii lungnemna leh Laisiangtho a theih tel na hangin Pasian thu umlo mi tampi ki khel uh hi. Anthony in a sanggam zateih te Pasian hilh dingin St. Francis zateih sung pan phalna angah masa pen zateih khat ahi hi. “Hi bangin pilna sinna in thunget nopna leh zahtak nopna lungsimte pan hong dal zo lo hi” ci-in Anthony in gen hi.
Anthony in ama nuntak hun nunung sungteng pen Padua khua ah bei sakin Kum (36) a phak hunin tua khua ah si hi. Asih zawh kum khat khit ciangin Anthony ii alah nalamdang tampi piang aa minthang mahmah hi. Alamdang penin Anthony in a khut ah naupang Jesu tawi in a kimuhna hi. Anthony ii a Siangtho Laisiangtho a theihtelna lim lahna in laibu tawh ahi zongin, ama siangthona lim lahna in Lily paak tawh ahi zongin ama lim ki suai hi. Anthony ii a khut tawh a laptoh Siangtho Pumpi mai ah a khukdin Lano in ama nung zui zel hi. Tua thu hangin Lano neipa in upna thupha sang hi.
Misiangtho Anthony pen mizawngte belh Misiangtho hi-in ama thungetsakna ngah na dingin cih ngiimna tawh mizawngte adding a kipiakhia sum, van te pen “Misiangtho Anthony ii Pongmoh” ci-in sam uh hi. Tua banah a kimansuah van te muh kik nading in zong Misiangtho Anthony kiangah huhna ki ngen hi. Bang hang hiam cih leh khat vei, tangval siangtho khat in Anthony ii thungetna laibu gukin tam sim hi. Anthony in a laibu a muhkik na ding thu a nget ciangin laibu gupa lungsim sungah tua laibu a lakna ah a koih nading thu na ki gen hi.
Misiangtho Anthony aw…Kote adingin thu hong ngetsak tan.