Misiangtho Andrew pawini. (November 30)

Nungzuipi Andrew in Galilee gam, Bethsaida khua ah AD 5- AD 10 hunin suak hi. Amah in Jonah ii ta hi-in, St. Simon tawh unau hi. Topa Jesu in tuisawpna asang khit ciang, ama kiangah “Topa, nang koi ah om na hiam?” ci-in St. Andrew in dong hi. 
A zing ciangin a upa Simon kiangah pai-in, “ko te in Mesiah ka mu uh hi” ci-in gen in a upa zong Topa Jesu kiangah paipih hi (Jn 1: 35-42). Khasiangtho Pasian hong kum ni ahi, Pentecost pawi man khit ciangin Andrew in mun khempeuh ah pai-in lungdamna thu tangko kawikawi hi. 
Pawlpi in akhangkhang in hong hilh ahi, Pawlpi ngeina ii gen na ah Andrew in Greek gam, Patras ah AD-60 hunin, (X) lim, Singlamteh tungah khai-in thahna thuak hi. Amah in tua singlamteh tung panin asih ma ninih sung Pasian thu gen lai hi. Andrew pen Russia gam, Greek gam leh Scotland gamte acing akem Misiangtho in ki ciamteh hi.
Misiangtho Andrew aw…Ko te adingin thu hong ngetsak tan.
--------
Misiangtho Andrew tangthu pen Laisiangtho sunga kigelh teng lo buang kitam theih lo hi. Ahizongin kei kong gen ding pen kum 100 tampi sung a kigensawn thu ahihi. Amah pen Jesu nungzuipi 12 lakah khat a hihi.
Nikhat Andrew pen France gamtaw lam a khuapi khat ahi Nice khua ah pai hi. Hih khuapi pen mi tampi in phalbi laitak zuan uh hi. Akhuahun nuamin phalbi laitakin zong vot lua lo hi. Andrew pen Nice khua a tun ciangin ansai khat ah an ne dingin hong kithawi hi.
Ansai neipa tawh hong kiho uh hi.
“Mi thak hi ve teh aw mete? Hong mungei nai keng!”
“Himah ingh. Kong pai khat veina hi. Bang hangin tua thu hong dong na hiam?”
“Aw...Kong gennop thu khat om a, tua hang hi e. Hih khuapi panin Cap d'Antibes lam zuatna lampi ah Dawi Sagih om uh hi. Tua lampi a tawn peuhpeuh Dawi Sagihte in that uh hi.”
“Banghangin Dawi Sagihte in mi that uh ahiam?”
“Akha uh a deih man uh ahi hi. Adiak diak in a thudik mel het lote ne nuam pha diak hi” ci-in ansai neipa in dawng kik hi.
Andrew in dawng a, “Kei ka mel thudik mel lo maw leh?” ci hi.
“Na heh ken la, thudik mel hongsa kei takpi ingh.”
Andrew in an a kham khit ciangin kithawi pah biangbuang a, Cap d'Antibes lam zuan in pai pah hi. Khua nawl a tun ciangin Andrew awng khia a, “No Dawi Sagihte aw, hong kilangh khia un. No tawh kiholim
nuam ingh!”ci hi.
Dawi Sagihte zong ui in hong kilangh khia uh hi. Peh sawm in taai phei pah ngeingai uh hi.
“Pasian min tawh thu kong pia hi. Khawl un. Hih lai mun panin pai khia unla, cikmahin hong kilehkik nawn kei un” ci-in Andrew in hawl khia hi. Uite zong mang pah vingveng uh hi.
Nice khuamite in lamdangsa uh a, a vekun Christian suak uh hi. Nice khuapi sungah tawlpi khat sung Andrew taam a, Pasian thuthuukte hilh hi. Muanhuai ta in teh a cih ciangin Andrew in Cap d'Antibes ah vapai hi.
Cap d'Antibes khua a va tun ciangin misi na om hi. Innteekpa kiangah Andrew in thu dong a, “Hih na tapa pen bangci sih a hiam?” va ci hi.
“Khua nawlah khatvei lamshiau in a va paileh Ui vom Sagih in na petlum uh hi.”
Uivom Sagih cih a zaak ciangin Andrew in Dawi Sagihte ahihlam phawk pah hi.
“Na tapa sihna panin thokik sak hileng bang hong pia ding na hiam?”
“Kei pen mizawng mahmah hi'ng. Kong piak theih khat bek om hi, tua pen ka kawnggaak kawma ka koihsim suangmanpha tang khat bek hi.”
“Ken tua deih keng, na tapa deih ingh. Nong pia ngam diam?”
“Ka tapa na deih leh hong pia ngam mah ning.”
Tua bangin a kiho khit uh ciangin Andrew in thungen a, Pasian in misipa tho sak kik in, tuani akipan Andrew nung zui pahin a nasep tampi huh hi.
Andrew in Dawi Sagihte samkik a, “Tu akipan kuamah nawngkai sak nawn kei un. Na omna vuah om suak unla, cikmah in hong kilangh nawn kei un” ci-in thupia hi. Dawi Sagihte bei siang suak pah uh hi. Andrew in tua khua ah mi tampi Christian suaksak a, kumpipa zi naleng zong Christian suaksak zo hi. Kumpipa in hih thu a zak ciangin heh mahmah a, Andrew sam in, “Zing ciang in ka pasiante ka biakna innpi sungah hong pai inla, ka pasian te maiah biakpiakna na pia ding hí” cí hí.
Andrew in dawng pah a, “Ken zingsang simin Mawhneilo Tuuno tawh biakpiakna bawl den ingh. Tua tuuno pen mikim in sanguh hi. Ahizongin tua Tuúno pen si lo hi" ci hi. Missa biakpiakna thu a gen ahihlam kumpipa in thei lo hi.
“Tua bang thu om kei. Hai ciakciak kawh!”
“Christian na suah kei buang leh híh thuthuuk pen tel zo ngei lo ding hi teh. Tua banah hih thuthuukte pen milimbiate nuihzakna lel dingin ka gen kei ding hi. Na zi danin Christian na suah leh bek hong gen ning!”
Tua thu in kumpipa hehna hai dimletsak a, nasia takin Andrew in bawlsiatna thuak hi. Tua khit ciangin kumpipá in, “Na Jesu cihcih tawh akibangin singlamteh tungah kong khai lum ding hi” ci hi.
Andrew in maitai takin, “Ka Topa Jesu sih danin nong thah ding leh ka nuamzaw ding hi. Hamphatna ahi hi” ci hi.
Kumpipa in mit san gemgam in, “Singlamteh pen X danin ka bawl dinga, tua tungah kong khailum ding hi" ci hi.
“Nong khaina ding singte na utut in bawl in, phamawh kei! Ka Pasian min tawh ka sih ding a thupi hizaw” cihsan ziau hi.
Acih bang lianin X tawh a kibawl singlamteh tungah kumpipa in Andrew khailum hi. Andrew pen Scotland gamin Patron Saint in zangh uh hi. Scotland dialkhai pen a eng colour hi in, dialkhai tungah St. Andrew sihna singlamteh X lim kituangsak hi. Andrew min a nei pen Scotland gamah tam mahmah uh hi. (Hih tangthu pen Francis Dal Lam Thang ii bawl Misiangtho te’ tangthu laibu sung pan a ki la kik hi.)