Misiangtho Alena Pawini. (June 18)

Misiangtho Alena in kumzalom (7) hunin Belgium gam, Brussels khua, Dilbeek a cihna munah suak hi. A pa pen kumpi hi-in a nu leh pa te in Pasian um lo-in dawi bia te ahi uh hi.
Alena in a nu leh pa te theih loh kalin tuisawpna sacramentu sang simin Christian khat suak hi. Biakinn a pai ciangin zong a nu leh pa te theih loh kalin pai sim den hi. Khat vei ciangin a pa in a ma’ nasem te kiangah Alena nung zui sim in a et sim nadingin sawl hi. A nasem te in zong kumpipa sawlna bangin Alena nung a zuih sim uh ciangin Alena in guntui kantan in thungen dingin biakinn ah apai amuh uh ciangin a pa kiangah zasak pah uh hi.
Tua ciangin a pa in ka tanu in Christian te’ khemna thuak hi ci-in a mat nading un thu a piak ciangin a nasem te in zong Alena manin khau tawh hencip pah uh hi. Tua bangin a hen cip uh ciangin Alena in a suahtak nading in a ki tom ciangin a cing te in a ban langkhat sattan sak uh hi.
Alena a sih ciangin vantungmi te in a nu leh pa te mai ah kilanghin Alena ii ban langkhat pen biakinn sung Missa biakpiakna mai ah koih uh hi. Alena ii nu leh pa ahi kumpipa leh a zi te in tua thupiang hangin a lau uh hangin Alena ii upna hangin amaute zong a sawt lo-in thu um mi hong suak uh hi.
Misiangtho Alena pen mit tawh kisai damlohna a nei mite bek tham lo-in ha natna a nei te ii a belh diak misiangtho ahi hi. Bang hangin mit natna anei te belh misiangtho ahi hiam cih leh amah mintami ahih laitakin mit mu lo mikhat damsak zo ngei ahih man ahi hi.
Misiangtho Alena aw…kote adingin thu hong ngetsak in.