Hong kem vantungmi Pawi. (October 2)

Hong cing hong kem vantungmi te in Pasian piansak te lakah a lamdang diak pilna tawh kidimin a siangtho kha te ahi hi. Amaute’ vaipuakin Pasian na sep ding leh mite a cing a kem ding ahi uh hi. Amaute in pumpi neilo in hun leh munte kepna nuai ah omlo uh aa, a si thei lo tawntung kha te ahi uh hi.
Tua banah amaute sungah numei/pasal cih omlo hi (Mk 12: 25). Mihing khat ciatin amaute acing akem ding leh Pasian maiah amaute ading palai a sepsak ding vantungmi khat ciat nei hi.
Topa Jesu mahmah in vantungmi te a om na thu kipsak hi (Mt 18: 10). Vantungmi ahoih te ahi zongin, a hoih lo vantungmi te ahi zongin amaute in eite’ lungsim leh ngaihsutna tung bekah phattuamna hong pia hi. Eite’ lungsim deihna ahih leh amaute in bangmah hih thei lo uh hi. Tua ahihmanin na khat peuh peuh hih ding cih ih khensatna in eite ii suahtakna tungah kinga hi.
A hoih vantungmite sung pan pawl khatin vantungah a tawntungin Pasian bia in phat den uh aa, pawl khatte in Pasian deihna semin om uh hi. Pawl khat te ahih leh hi leitungah aom mihingte a kep kawmin Pasian maipha bia uh aa vantung gamnuam ii thupha sang den uh hi.
Pasian in mihing khat ciat acing akem dingin vantungmi khat ciat vaipuak apiakna hangin Pasian in mihingte tungah a koih a bei thei lo itna ki mu thei hi. Dawi mangpa lauhuaina, mihingte leh ganhingte lauhuaina, huihpi guahpi lauhuaina cih bangin lau huaina tuam tuam pan hong dal dingin Pasian in hong cing hong kem vantungmi te vaipuak apia ahi hi.
Tua hong kem vantungmite in mihingte sangin a liatzawk uh hangin Pasian deihna a sem dingin hi leitungah lawptakin hong kumsuk uh hi. Vantungmite in mihingte i nu gilsungah paai i kipat pankipan ih sih dongin hong cing hong kem uh hi.
“Kei hong kem dinga, Topa Pasian hong sawl vantungmi aw, ngaihsut hoih hong guan inla, sun leh zan in hong cing hong kem ta in.”