The Annunciation of the Lord

Topa Jesu Pian nading thu kizaksak na

 Galilee gam, Nazareth khua ah a teng, Maria minnei nungak khat kiangah thu a zasak dingin Pasian in vantung mi Gabriel a sawl hi. Tua Maria minnei nungaknu in David tapa Joseph tawh ki teng dingin zuthawl a kipiasa nungak khat ahi hi. Tua ciangin vantung mi Maria kiangah pai-a, “Ave Maria aw, hehpihna tawh na kidim hi. Topa in nang tawh om khawm a, numei khempeuh lakah thupha a ngah nu na hi hi” a ci hi.

Maria in tua thu a zak ciangin a lungmang mahmah a, “hih hopihna in bang a cihnopna hiam” ci-in ngaihsun hi. Vantung mi in “ Maria aw..lau kei in, bang hang hiam cih leh nangmah in Pasian’ maipha na ngah zo hi. Nangin nau na paai ding a, tapa khat na nei ding hi; tua tapa’ min Jesu na phuak ding hi. Amah mi lian hi dinga, Sang Penpa’ Tapa kici ding hi. Topa Pasian in a pu a pa David’ tokhom amah a pia ding hi. Amah in Jacob’ innkuan uk tawntung dinga, ama kumpi gam bei ngei lo ding hi,” a ci hi.

Ahi zongin Maria in “Keimah in nungak ka hi hi, hih thu koici pian theih ding ahi hiam?” a ci hi. Vantung ji in ama kiangah, “Kha Siangtho in nangma tungah hong tung dinga, Sang penpa’ vangliatna in nang hong tuam ding hi. Tua ahih manin na sung pana hong suak ding naungek pen siangtho dinga, Pasian’ Tapa kici ding hi. Tua ciangin tu-in na tanaupihnu Elizabeth in a teek khit nung nangawnin tapa khat a paai khin hi. Amah tasel hi, kici napi-in a gaii zawh kha guk pha ta hi. Bang hang hiam cih leh, Pasian’ aadingin ahi thei lo bangmah om lo hi,” ci-in a dawng hi. Tua ciangin Maria in “Keimah in Topa’ silanu ka hi hi, na gen bangin kei’ tungah hong piang ta hen,” a cih khit ciangin ama kiang panin vantung mi a paikhia hi.